سەرىكجان ءبىلاش مىرزاعا!
مەن ءسىزدىڭ شاقىرۋىڭىزدى كوردىم، راxمەت! بىراق، 6.03. كۇنى سىزگە بارا المايمىن، ءدال سول كۇنى قولىم تيمەيدى، سەبەبى استانادا تۇرام. شىنىمدى ايتسام، قولىم تيگەن كۇننىڭ وزىندە دە، الماتىعا ۇشىپ بارىپ ءسىزدىڭ لەكتسياڭىزدى تىڭداۋعا ۋاقىتىم جوق. ال ورالماندارعا كومەك كورسەتۋگە كەلەتىن بولساق، ءسىز ايتپاي-اق تا، ءتىپتى "اتاجۇرت" ۇيىمى قۇرىلماي تۇرىپ تا تالاي قازاققا، "ورالمان" دەپ بولمەي-اق، كومەگىمدى كورسەتىپ كەلەمىن. جالپى، ۇلتتىق ماسەلەلەرىمەن اينالىسىپ جۇرگەنىمە 10 جىلداي بولدى.
ونىڭ ىشىندە قىتايدان كەلگەن باۋىرلارىم دا بار. بىراق، ونىڭ ءبارىن ءسىز سياقتى "مەن قىتايدان كەلگەن 7 جانۇيانى اسىراپ وتىرمىن" دەپ الەۋمەتتىك جەلىنى شۋلاتقان جوقپىن. جانە ءسىز سياقتى "مەن تانكىمىن، سەندەر كورتىشقانسىڭدار، شىنجىر تابانىممەن ادەيى مىجعىلاپ تاپتاپ وتەمىن" دەپ ءوزىمدى تانكىگە، ۇلى اقىنداردى سارشۇناق تىشقانعا تەڭەگەن ەمەسپىن. بۇل استامشىلدىق، مەنمەندىكتىڭ بەلگىسى دەپ بىلەم. مۇحتار شاحانوۆ، مەكەمتاس مىرزاحمەتوۆ، عابباس قابىشۇلى، تەمىرحان مەدەتبەك سىندى اعالارىمىز امان بولسىن. مەن ولاردى بۇدان بۇرىن دا قولداپ ءجۇردىم، بۇدان بىلاي دا قولدايمىن.
قۇرمەتتى سەرىكجان مىرزا!
جاساپ جاتقان جۇمىسىڭىزعا ساتتىلىك تىلەيمىن! قىتايداعى قازاقتىڭ تاعدىرى تەك ءسىزدىڭ ەمەس، بارشا قازاقتى الاڭداتىپ وتىر. بۇل ماسەلە ءسىزدىڭ جالىندى سوزدەرىڭىزبەن ەمەس، ەكى مەملەكەت ارالىق كەلىسىم شارت ارقىلى عانا شەشىلەدى.
بۇل جەردە ءسىز زيالى اعالارىمىزعا ەمەس، بيلىككە وكپەلىڭىز، شاxانوۆتى ەمەس، كۇشتى بولساڭىز بيلىكتىڭ ءوزىن سىناڭىز. قازاقتىڭ ۇلتتىق ماسەلەسى تەك ورالمان ماسەلەسىمەن شەكتەلمەيدى، بۇل دا ەسىڭىزدە بولسىن.
ال كومەك ماسەلەسىنە ورالاتىن بولساق، مەن ەشقاشان كومەك كورسەتۋدەن باس تارتقان جوقپىن. جاعدايى قيىن قىتايدان كەلگەن ءبىر-ەكى اعايىننىڭ ەسەپ-شوتىن جىبەرىڭىز، قولىم كەلگەنشە كومەگىمدى البەتتە كورسەتەمىن. ەرتەڭ، "مەن شاقىردىم، ولار كەلگەن جوق" دەپ قازاقتىڭ اراسىنا ىرىتكى سالماڭىز، بىرەۋگە مىندەتسىنبەي جاقسىلىق جاساڭىز. بار كۇشىڭىزدى از قازاقتى بىرىكتىرۋگە جۇمساڭىز!
ىزگى نيەتپەن، مۇxتار تايجان
