Serikjan Bilásh myrzaǵa!
Men Sizdiń shaqyrýyńyzdy kórdim, raxmet! Biraq, 6.03. kúni Sizge bara almaımyn, dál sol kúni qolym tımeıdi, sebebi Astanada turam. Shynymdy aıtsam, qolym tıgen kúnniń ózinde de, Almatyǵa ushyp baryp Sizdiń lekııańyzdy tyńdaýǵa ýaqytym joq. Al oralmandarǵa kómek kórsetýge keletin bolsaq, Siz aıtpaı-aq ta, tipti "Atajurt" uıymy qurylmaı turyp ta talaı qazaqqa, "oralman" dep bólmeı-aq, kómegimdi kórsetip kelemin. Jalpy, ulttyq máselelerimen aınalysyp júrgenime 10 jyldaı boldy.
Onyń ishinde Qytaıdan kelgen baýyrlarym da bar. Biraq, onyń bárin Siz sııaqty "men Qytaıdan kelgen 7 januıany asyrap otyrmyn" dep áleýmettik jelini shýlatqan joqpyn. Jáne Siz sııaqty "men tankimin, sender kórtyshqansyńdar, shynjyr tabanymmen ádeıi myjǵylap taptap ótemin" dep ózimdi tankige, uly aqyndardy sarshunaq tyshqanǵa teńegen emespin. Bul astamshyldyq, menmendiktiń belgisi dep bilem. Muhtar Shahanov, Mekemtas Myrzahmetov, Ǵabbas Qabyshuly, Temirhan Medetbek syndy aǵalarymyz aman bolsyn. Men olardy budan buryn da qoldap júrdim, budan bylaı da qoldaımyn.
Qurmetti Serikjan myrza!
Jasap jatqan jumysyńyzǵa sáttilik tileımin! Qytaıdaǵy qazaqtyń taǵdyry tek Sizdiń emes, barsha qazaqty alańdatyp otyr. Bul másele Sizdiń jalyndy sózderińizben emes, eki memleket aralyq kelisim shart arqyly ǵana sheshiledi.
Bul jerde Siz zııaly aǵalarymyzǵa emes, bılikke ókpelińiz, Shaxanovty emes, kúshti bolsańyz bıliktiń ózin synańyz. Qazaqtyń ulttyq máselesi tek oralman máselesimen shektelmeıdi, bul da esińizde bolsyn.
Al kómek máselesine oralatyn bolsaq, men eshqashan kómek kórsetýden bas tartqan joqpyn. Jaǵdaıy qıyn Qytaıdan kelgen bir-eki aǵaıynnyń esep-shotyn jiberińiz, qolym kelgenshe kómegimdi álbette kórsetemin. Erteń, "men shaqyrdym, olar kelgen joq" dep qazaqtyń arasyna iritki salmańyz, bireýge mindetsinbeı jaqsylyq jasańyz. Bar kúshińizdi az qazaqty biriktirýge jumsańyz!
Izgi nıetpen, Muxtar Taıjan
