قازاق تىلىنە سۇرانىس ارتقاندا عانا ول كوپشىلىك كەڭ قولداناتىن ءتىل بولادى. بۇل تۋرالى قازاقستان حالقى اسسامبلەياسىنىڭ ءحححىى سەسسياسىندا مەملەكەت باسشىسى قاسىم-جومارت توقاەۆ ايتتى، دەپ حابارلايدى “ادىرنا» ۇلتتىق پورتالى.
«بارلىق ازاماتتىڭ مەملەكەتتىك ءتىلدى مەڭگەرۋ ماسەلەسى ساياساتىمىزدىڭ ستراتەگيالىق باعىتى بولىپ قالا بەرەدى. قازاق ءتىلى – ازاماتتىق ينتەگراتسيانىڭ ءتيىمدى قۇرالى، مادەني-رۋحاني تۇتاستىقتىڭ جارقىن كورىنىسى. سونداي-اق قازاق ءتىلى عىلىمي پروگرەسس پەن ءبىلىمنىڭ وزىق جەتىستىكتەرىنە جول اشاتىن قۇرالعا اينالۋى كەرەك. بۇل – تەك سالالىق مينيسترلىكتەردىڭ عانا ەمەس، بۇكىل قوعام بولىپ شەشەتىن تاريحي مىندەت. وسى رەتتە اسىراسىلتەۋشىلىك پەن داڭعازالىققا جول بەرمەي، پاراساتتى ءارى دايەكتى تۇردە ارەكەت ەتكەن ءجون. مەملەكەتتىك ءتىلدى وقىماعان جانە ءتيىستى دەڭگەيدە مەڭگەرمەگەن ازاماتتار ءتىل بىلمەگەنى ءۇشىن قىسىم كورمەۋگە ءتيىس. سونىمەن قاتار ءبىزدىڭ قوعامدا مەملەكەتتىك ءتىلدى ۇيرەنۋ، ونى بىلۋگە ۇمتىلۋ قالىپتى جاعدايعا اينالۋى قاجەت»، - دەدى پرەزيدەنت.
مەملەكەت باسشىسى قازاق تىلىنە سۇرانىس ارتقاندا عانا ول كوپشىلىك كەڭ قولداناتىن ءتىل بولاتىندىعىن باسا ايتتى.
«تۇپتەپ كەلگەندە، بىرنەشە ءتىل ءبىلۋ – ءار ادامنىڭ مادەنيەتتىلىگىنىڭ بەلگىسى. ال مەملەكەتتىك ءتىلدى، اسىرەسە انا ءتىلىن، ياعني قازاق ءتىلىن ءبىلۋ – قانداي دا ءبىر ازاماتتىڭ مادەني ورەسى، ازاماتتىق جاۋاپكەرشىلىگى قانشالىقتى بيىك ەكەنىن بىلدىرەدى. سونداي-اق قانشالىقتى پاتريوت ەكەنىن كورسەتەدى. جالپى، مەملەكەتتىك ءتىل توڭىرەگىندە وڭ كوزقاراس ۇستانۋ قاجەت. ءتىل ماسەلەسىنە قاتىستى بارلىق پىكىرتالاس ەتنيكالىق ەمەس، ازاماتتىق جانە ساياسي سيپاتقا يە ەكەنىن ءتۇسىنۋ ماڭىزدى»، - دەدى قاسىم-جومارت توقاەۆ.
