Qazaq tiline suranys artqanda ǵana ol kópshilik keń qoldanatyn til bolady. Bul týraly Qazaqstan halqy Assambleıasynyń HHHII sessııasynda memleket basshysy Qasym-Jomart Toqaev aıtty, dep habarlaıdy “Adyrna» ulttyq portaly.
«Barlyq azamattyń memlekettik tildi meńgerý máselesi saıasatymyzdyń strategııalyq baǵyty bolyp qala beredi. Qazaq tili – azamattyq ıntegraııanyń tıimdi quraly, mádenı-rýhanı tutastyqtyń jarqyn kórinisi. Sondaı-aq qazaq tili ǵylymı progress pen bilimniń ozyq jetistikterine jol ashatyn quralǵa aınalýy kerek. Bul – tek salalyq mınıstrlikterdiń ǵana emes, búkil qoǵam bolyp sheshetin tarıhı mindet. Osy rette asyrasilteýshilik pen dańǵazalyqqa jol bermeı, parasatty ári dáıekti túrde áreket etken jón. Memlekettik tildi oqymaǵan jáne tıisti deńgeıde meńgermegen azamattar til bilmegeni úshin qysym kórmeýge tıis. Sonymen qatar bizdiń qoǵamda memlekettik tildi úırený, ony bilýge umtylý qalypty jaǵdaıǵa aınalýy qajet», - dedi Prezıdent.
Memleket basshysy qazaq tiline suranys artqanda ǵana ol kópshilik keń qoldanatyn til bolatyndyǵyn basa aıtty.
«Túptep kelgende, birneshe til bilý – ár adamnyń mádenıettiliginiń belgisi. Al memlekettik tildi, ásirese ana tilin, ıaǵnı qazaq tilin bilý – qandaı da bir azamattyń mádenı óresi, azamattyq jaýapkershiligi qanshalyqty bıik ekenin bildiredi. Sondaı-aq qanshalyqty patrıot ekenin kórsetedi. Jalpy, memlekettik til tóńireginde oń kózqaras ustaný qajet. Til máselesine qatysty barlyq pikirtalas etnıkalyq emes, azamattyq jáne saıası sıpatqa ıe ekenin túsiný mańyzdy», - dedi Qasym-Jomart Toqaev.
