اتىراۋ وبلىسىنداعى جانگەلدين اۋىلىندا ءبىر وتباسىنىڭ قازاسىنا بايلانىستى قوزعالعان قىلمىستىق ءىس بويىنشا جاڭا مالىمەت ايتىلدى، دەپ حابارلايدى «ادىرنا» ءتىلشىسى.
وبلىس پروكۋرورىنىڭ كومەكشىسى جاندار بولاتبەك مارقۇمداردىڭ قىزى اقبايان مۇقانعاليەۆاعا قاتىستى قىلمىستىق قۋدالاۋ توقتاتىلعانىن جەتكىزدى.
«ايەلدىڭ كىسى ءولتىرۋ فاكتىسىنە قاتىسى بولماعاندىقتان، وعان قاتىستى قىلمىستىق قۋدالاۋ توقتاتىلدى. الايدا قىلمىس تۋرالى حابارلاماعانى ءۇشىن بولەك ءىس تىركەلدى. دەگەنمەن، بۇل ءىس بويىنشا ءالى قۇقىقتىق باعا بەرىلگەن جوق. اقبايان مۇقانعاليەۆا كۇدىكتى رەتىندە تانىلماعان جانە وعان ەشقانداي بۇلتارتپاۋ شاراسى قولدانىلماعان»،- دەدى ول.
ايتۋىنشا، الماتى قالاسىندا مۇقانعاليەۆاعا قاتىستى پسيحياتريالىق ساراپتاما جۇرگىزىلگەن. بىراق ونىڭ قورىتىندىسى ءالى پروكۋراتۋراعا تۇسپەگەن.
«ساراپتاما قورىتىندىسى دايىن دەگەن اقپارات بار، بىراق ءبىز ءالى العان جوقپىز. قۇجات تۇسكەن سوڭ زەرتتەلەدى. قاجەت بولسا، قوسىمشا ساراپتاما تاعايىندالادى»، – دەدى جاندار بولاتبەك.
ايتا كەتەيىك، اتىراۋدا ءبۇتىن ءبىر وتباسىنىڭ ولىمىنە قاتىستى العاشقى سوت وتىرىسى 18 مامىردا وتەدى. اۋلەتتىڭ بۇرىنعى كۇيەۋ بالاسى سۇلتان سارسەماليەۆ سوتتا 13 ەپيزود بويىنشا جاۋاپ بەرمەك.
