جۋرناليست دۋمان مۇحامەتكارىم الماتىدا كەزەكتەن تىس پارلامەنت سايلاۋىنىڭ ناتيجەسىمەن كەلىسپەيتىنىن مالىمدەگەن سوڭ 25 كۇنگە قاماۋعا الىندى. بۇل تۋرالى ونىڭ ادۆوكاتى عالىم نۇرپەيىسوۆ Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، مۇحامەتكارىم بەيبىت جيىنداردى ۇيىمداستىرۋ جانە وتكىزۋ ءتارتىبىن بۇزدى دەگەن ايىپپەن ۇستالعان. مۇحامەتكارىمنىڭ قاماۋعا الىنعانى تۋرالى اقپاراتتى ونىڭ جاقتاستارى – جۋرناليست دينارا ەگەۋباەۆا مەن بەلسەندى ءالنۇر يلياشەۆ راستادى.
ال پوليتسيا ءماجىلىس دەپۋتاتتىعىنا تاۋەلسىز كانديدات دۋمان مۇحامەتكارىمدى ازاماتتاردى «زاڭسىز ارەكەتكە» شاقىردى دەپ ايىپتاۋدا.
«د.مۇحامەدكارىمگە قاتىستى قر اقبتك-ءنىڭ 488-بابىنىڭ 12-بولىگىندە (قازاقستان رەسپۋبليكاسىنىڭ بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭناماسىن بۇزۋ) كوزدەلگەن قۇقىق بۇزۋشىلىقتى جاساۋ تۋرالى حاتتاما تولتىرىلدى. ويتكەنى ول ءبىر جىل ىشىندە وسىنداي قۇقىق بۇزۋشىلىقتى قايتا جاساعان. قوناەۆ قالالىق سوتىنىڭ اعىمداعى جىلدىڭ 21 ناۋرىزىنداعى قاۋلىسىمەن د.مۇحامەدكارىم قر اقبتك-ءنىڭ جوعارىدا كورسەتىلگەن بابى بويىنشا زاڭسىز ارەكەتتى ۇيىمداستىرۋعا شاقىرعانى ءۇشىن قاماۋعا الۋ تۇرىندەگى اكىمشىلىك جاۋاپكەرشىلىككە تارتىلدى»، دەلىنگەن الماتى وبلىسى پوليتسياسىنىڭ حابارلاماسىندا.
20 ناۋرىزدا دۋمان مۇحامەتكارىم Facebook جەلىسىندە جازبا جاريالاپ، 21 ناۋرىز كۇنى تۇستەن كەيىن الاڭعا شىعاتىنىن مالىمدەپ، وزگەلەردى دە وعان قوسىلۋعا شاقىردى.
ايتا كەتەيىك، قاڭتاردىڭ 30-ى كۇنى YouTube-تەگى «نە دەيدى» ارناسىنىڭ اۆتورى، قاڭتار وقيعاسىن بەلسەندى جاريالاعان جۋرناليست دۋمان مۇحامەتكارىم ماجىلىستەگى سايلاۋ دوداسىنان شەتتەتىلدى.
