الماتىدا سەيفۋللين داڭعىلى بويىندا ەكى جۇرگىزۋشى اراسىندا بولعان جانجالدان كەيىن قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى.
وقيعاعا قاتىستى بەينەجازبا الەۋمەتتىك جەلىلەردە تاراعان.
وقيعا Forum ساۋدا ورتالىعىنىڭ ماڭىندا بولعان. الەۋمەتتىك جەلىدە تاراعان كادرلاردان قارا ءتۇستى ROX 01 كولىگىنىڭ جۇرگىزۋشىسى جولعا قوسىلىپ، كەرى بۇرىلۋعا ارەكەت جاساعانى كورىنەدى. وسى كەزدە نەگىزگى جولمەن كەلە جاتقان باسقا كولىك وعان جول بەرمەگەن. كەيىن كولىك جۇرگىزۋشىلەرى اراسىندا جانجال تۋىنداعان. بەينەجازبادا ROX 01 جۇرگىزۋشىسىنىڭ ەكىنشى كولىكتىڭ جۇرگىزۋشىسىن توقتاتقانى، كولىكتەن تۇسكەن ەر ادامعا سوققى جاساعانى بايقالادى. سوققىدان كەيىن ەر ادام جەرگە قۇلاعان.
الماتى پوليتسيا دەپارتامەنتىنىڭ مالىمەتىنشە، وقيعاعا قاتىستى بوستاندىق اۋداندىق پوليتسيا باسقارماسى دەنە جاراقاتىن كەلتىرۋ فاكتىسى بويىنشا قىلمىستىق ءىستى تەرگەپ جاتىر.
پوليتسيا وقيعانىڭ بىرنەشە اپتا بۇرىن بولعانىن حابارلادى. قازىرگى ۋاقىتتا جانجالعا قاتىسۋشىلاردىڭ بارلىعى انىقتالعان. ولارمەن قاجەتتى پروتسەسسۋالدىق ءىس-شارالار جۇرگىزىلىپ جاتىر. تەرگەۋ قورىتىندىسى بويىنشا قاتىسۋشىلاردىڭ ارەكەتتەرىنە قۇقىقتىق باعا بەرىلەدى.
