ماسكەۋ – استانا باعىتىنداعى اۋە رەيسىندە قوعامدىق ءتارتىپتى بۇزعان جولاۋشى ۇستالدى، دەپ حابارلايدى “ادىرنا” Polisia.kz سىلتەپ.
ۇشاق استانا اۋەجايىنا قونعاننان كەيىن 36 جاستاعى شەتەل ازاماتى كولىكتەگى پوليتسيا قىزمەتكەرلەرىنە تاپسىرىلعان.
كولىك پوليتسياسىنىڭ مالىمەتىنشە، ەر ادام الكوگولدىك ىشىمدىك ءىشىپ، قوعامدىق ءتارتىپتى بۇزعان. ول ەكيپاج مۇشەلەرىنىڭ تالاپتارىن ورىنداماي، وزگە جولاۋشىلارعا بالاعات سوزدەر ايتقان.
قۇقىق بۇزۋشىعا ۇساق بۇزاقىلىق جاساۋ، الكوگولدىك ىشىمدىكتەردى ءىشۋ نەمەسە قوعامدىق ورىنعا ماس كۇيدە كەلۋ، اۋە كەمەسىندەگى ءتارتىپ ەرەجەلەرىن بۇزۋ فاكتىلەرى بويىنشا اكىمشىلىك حاتتامالار تولتىرىلعان.
سوت شەشىمىمەن شەتەل ازاماتى 12 تاۋلىككە اكىمشىلىك قاماققا الىندى. سونىمەن قاتار ونىڭ بۇعان دەيىن دە ءبىر جىل ىشىندە الكوگول قولدانعانى ءۇشىن جاۋاپكەرشىلىككە تارتىلعانى انىقتالدى.
كولىك پوليتسياسى اۋە كەمەسىنىڭ بورتىنداعى ءتارتىپ تالاپتارىن ساقتاۋدىڭ ماڭىزىن ەسكەرتتى.
