الماتىدا بەلگىلى كاسىپكەر، ەكولوگ، يننوۆاتسيالىق پاتەنتتەردىڭ اۆتورى ولجاس دۇيسەن قاماۋعا الىندى. بۇعان دەيىن ول زاڭسىز قىسىم كورىپ جاتقانىن ايتىپ، الەۋمەتتىك جەلىدە مالىمدەمە جاساعان بولاتىن، دەپ حابارلايدى "ادىرنا" ۇلتتىق پورتالى.
"قازىرگى ۋاقىتتا مەنى تەرگەۋ يزولياتورىنا الىپ كەتۋگە كەلدى. ءبىز تاعىلعان ايىپتاردىڭ نەگىزسىز ەكەنىن دالەلدەيتىن بارلىق ايعاقتاردى ۇسىندىق. الايدا، پروكۋراتۋرا بۇل دالەلدەردى قابىلداماي وتىر. بۇل – زاڭسىزدىق. ەگەر مۇنداي جاعداي جالعاسا بەرسە، ەرتەڭ كەز كەلگەن ادام وسىنداي قىسىمعا ۇشىراۋى مۇمكىن", – دەدى ولجاس دۇيسەن الەۋمەتتىك جەلىدەگى سوڭعى جازباسىندا.
كاسىپكەردىڭ ايتۋىنشا، ول KazEcoSolutions سەرىكتەستىگىنىڭ بۇرىنعى سەرىكتەسى ەرجانوۆتىڭ ارىزى بويىنشا قىلمىستىق ىسكە تارتىلعان. العاشىندا وعان قارجى جىمقىرۋ ايىبى تاعىلسا، كەيىن بۇل ايىپتاۋلاردى جوققا شىعاراتىن قۇجاتتار ۇسىنىلعان سوڭ، پروكۋراتۋرا رەيدەرلىك جاسادى دەگەن جاڭا ءىس قوزعاعان.
ولجاس دۇيسەن بۇل ءىستىڭ ارتىندا بەلگىلى ءبىر تۇلعالاردىڭ مۇددەسى بارىن ايتىپ، قۇقىق قورعاۋ ورگاندارى ولاردىڭ تاپسىرىسىن ورىنداپ وتىر دەپ سانايدى. سونىمەن قاتار، بۇل ءبىرىنشى رەت جاسالعان قىسىم ەمەس ەكەنىن ەسكەرتتى. ول 2024 جىلدىڭ قاراشاسىندا باكۋدەگى كليماتتىق ميتينگكە قاتىسىپ جۇرگەن كەزدە وزىنە رەپرەسسيا جاسالۋى مۇمكىن ەكەنىن بولجاعانىن ايتتى.
ەكولوگتىڭ سوزىنشە، بۇل جانجال 2008 جىلدان بەرى جالعاسىپ كەلەدى. ول سەرىكتەستەرىمەن بىرگە KazEcoSolutions كومپانياسىن قۇرىپ، توپىراقتى تازارتۋ جانە قالدىقتاردى وڭدەۋمەن اينالىسا باستاعان. كەيىن بىرنەشە كەلىسىم ناتيجەسىندە كومپانيانىڭ جالعىز يەسى اتانعان. الايدا، ونىڭ بۇرىنعى سەرىكتەسى ەرجانوۆ بۇل مامىلەلەردى زاڭسىز دەپ تانىماق بولعان.
تاۋەلسىز اۋديت ناتيجەسىندە، كەرىسىنشە، ەرجانوۆتىڭ ءوزى 23 ميلليون تەڭگە قارجى جىمقىرعانى انىقتالعان. ەكولوگ ءارى كاسىپكەر ءوزىنىڭ تاعىلعان ايىپتار ويدان قۇراستىرىلعانىن ايتىپ، ادىلدىك تالاپ ەتىپ وتىر.
