الماتىدا 11 جاستاعى بالانىڭ اسقازانىنان 1 كەلى شاش شىقتى. بۇل تۋرالى الماتى قالاسىنىڭ قوعامدىق دەنساۋلىق ساقتاۋ باسقارماسى ءمالىم ەتتى، دەپ حابارلايدى “ادىرنا” ۇلتتىق پورتالى.
وتا بالالارعا شۇعىل مەديتسينالىق كومەك كورسەتۋ ورتالىعىندا جاسالعان.
«بالانىڭ ءىشى اۋىرىپ، ءبىر اپتا بويى قۇسىپ، تابەتى بولمادى، ونى جالپى السىزدىك مازالاعان. اۋرۋحاناعا جاتقىزىلعانعا دەيىن قىز اسقازان-ىشەك جولدارىنىڭ بۇزىلۋىنا بايلانىستى امبۋلاتورلىق ەم قابىلداعان. اقپاننىڭ 1-ىندە بالا جەدەل اپپەنديتسيتكە كۇدىكپەن قابىلداۋ بولىمىنە جەتكىزىلدى، ونىڭ دياگنوزى ديناميكالىق باقىلاۋ بارىسىندا جوققا شىعارىلدى»، - دەيدى بشمككو ءىرىڭدى جانە كەۋدە حيرۋرگياسى ءبولىمىنىڭ مەڭگەرۋشىسى ساماتبەك مىرزاحمەت.
قىزعا شۇعىل تۇردە ءىش قۋىسى مۇشەلەرىنە ۋدز، ەزوفاگوگاسترودۋودەنوسكوپيا جاسالدى.
«اسپاپتىق تەكسەرۋ ساتىسىندا اسقازان كولەمدى «دىبىس ىزدەرىن» قۇرايتىن كوپتەگەن ەحو-تەرىس تۇزىلىستەرمەن تولعانى بەلگىلى بولدى. زەرتتەۋ ناتيجەلەرى اسقازان قۋىسىندا كولەمدى ءتۇزىلىستى كورسەتتى: اسقازاندا كوپتەگەن گەتەروگەندى بولشەكتەن، شاش ورىمىنەن جانە شىرىشتان تۇراتىن ونىڭ بۇكىل كولەمىن تولتىراتىن لاس قارا ءتۇستى بوگدە دەنە انىقتالدى. قورىتىندى: اسقازاننىڭ تريحوبەزوارى»، - دەيدى ءبولىم مەڭگەرۋشىسى ساماتبەك مىرزاحمەت.
دارىگەرلەر ناۋقاسقا ناركوزبەن لاپاروتوميا، گاستروتوميا، اسقازاننان بوگدە زاتتى الىپ تاستاۋ وتاسىن جاسادى.
«اسقازان قۋىسىندا 16*6*5 سم، سالماعى 1000 گ ۇلكەن كولەمدەگى تىعىز، كوپتەگەن شاشتان تۇراتىن تاماق ماسساسى مەن شىرىش جابىسقان كونگلومەراتپەن بەينەلەنگەن بوتەن دەنە (تريحوبەزوار) تابىلىپ، شىعارىلدى»، - دەدى بشمككو بالالار حيرۋرگى، م.ع.ك. ساۋلە سۇلەيمانوۆا.
جۇتۋ ناتيجەسىندە اسقازان-ىشەك جولىنا تۇسەتىن بوگدە دەنەلەر بەزوارلار دەپ اتالادى. ەڭ كوپ كەزدەسەتىنى وسىمدىك تەكتەس فيتوبەزوارلار، ولاردىڭ پايدا بولۋىنىڭ سەبەبى - جاڭعاق، ءىنجىر، ءجۇزىم، شابدالى، تسيترۋس جەمىستەرى جانە ت.ب. ورگانيكالىق تەكتى بەزوارلار كەيبىر دارىلىك زاتتار، لاك، شايىردى جۇتقاندا اسقازاندا تۇزىلەدى.
«پەدياتريالىق تاجىريبەدە شاش نەمەسە جۇننەن تۇزىلگەن اسقازانداعى تۇزىلىمدەر ەرەكشە قىزىعۋشىلىق تۋدىرادى. مۇنداي بەزوارلار شاش، قاس جانە كىرپىگىن جۇلىپ، جۇتاتىن پاتولوگيالىق بەيىمدىلىگى بار قىزداردا كەزدەسىپ، تريوتروتيللومانيا دەپ اتالادى. بۇل اۋرۋ جابىسقاق كۇيىنىش بۇزىلىسى بار بالالاردا، دەۆيانتتى مىنەز-قۇلىقتى بالالاردا ءجيى كەزدەسەدى. ناتيجەسىندە اسقازاندا تاماق ماسساسى مەن شىرىشپەن قانىعىپ جابىسقان شاش شۇيكەسى پايدا بولادى. كەيدە ۇلكەن تريحوبەزوار اسقازاننان ۇلتابار مەن اش ىشەككە دەيىن جەتەدى»، – دەيدى مەديتسينا عىلىمدارىنىڭ كانديداتى، بالالار حيرۋرگى ساۋلە سۇلەيمانوۆا.
مەديتسينالىق ورتالىعىنىڭ مالىمەتىنشە، بۇل - 2023 جىلى «اسقازاننىڭ تريحوبەزوارى» دياگنوزى قويىلعان العاشقى جاعداي.
