ءيسى قازاققا ەسىم-سويى ەرەكشە تانىس تۇڭعىشباي جامانقۇلوۆتى بىلەسىزدەر عوي... 2017جىلى كينوعا بولىنگەن قارجىنى جەپ قويعاندارمەن قاتىسى بولىپ شىعىپ، سوت شارتتى جازا كەسكەن، ول كىسىگە.
سوت بولارعا دەيىن تۇڭعىشباي جامانقۇلوۆ ءوزىنىڭ بۇل ىسكە شاتىلۋىنا مينيستر مۇحامەديۇلىنىڭ قاتىسى بارىن ايتىپ، جۇرت الدىندا سويلەگەن. ءتىپتى، پرەزيدەنتكە دە بىرنەشە مارتە قايرىلا سويلەپ، وزىنە اراشا ءتۇسۋىن وتىنگەن ەدى.
«فەنيكس» ءفيلمىن تۇسىرۋگە مەملەكەتتەن بولىنگەن قارجىنى جىمقىرۋعا قاتىستى ايىپتالعان توعىز ادامعا ۇكىم شىقتى. سوتتالۋشىلار تۇگەلدەي ايىپتى دەپ تانىلىپ، بارىنە شارتتى جازا كەسىلدى. نەگىزگى ايىپتالۋشىلاردىڭ ءبىرى، وسىعان دەيىن قازاقستان پرەزيدەنتى نۇرسۇلتان نازارباەۆ بىرنەشە رەت كومەك سۇراعان اكتەر تۇڭعىشباي جامانقۇلوۆ سوت زالىنان شىققاننان كەيىن «پرەزيدەنتكە وكپەلى» ەكەنىن ايتتى.
«ارنايى ۇندەۋ جاساعان پرەزيدەنتىمە ۇلكەن ءىنىسى رەتىندە وكپەلىمىن. اراشا تۇسپەگەنىنە وكپەلىمىن. پرەزيدەنتىمىزدىڭ قاسىندا جۇرگەن كەيبىر قاسكويلەردىڭ بولعانىنا وكپەلىمىن. پرەزيدەنتىمىزدىڭ اق ادال سەنگىشتىگىن پايدالانىپ، قاسىندا جۇرگەندەردىڭ ول كىسىنى كوپ نارسە جايىندا باسقا پىكىر قالىپتاستىرىپ جۇرگەنىنە اشۋلانام. سوندىقتان دا مەن ۇكىمدى قابىلدامايمىن.
مەن ەلباسىما دا كىرىپ شىعۋعا تىرىسامىن، ەگەر قابىلداسا. وسى جاعدايدى ايتىپ شىعامىن. بۇرىن قازاقي ادەپتىلىكپەنەن، قازاقي تاربيەلىلىكپەن، ىنىلىكپەن، كىشىلىكپەن كوپ نارسەنى ايتپاي، ول كىسىنىڭ كوڭىلىن بۇزباۋ ءۇشىن اۋزىمدى تارتىپ، ءتىلىمدى بايلاپ جۇرگەن ەدىم. ەندى مەن نەدەن قورقام؟..»، دەگەن ەدى تۇڭعىشباي جامانقۇلوۆ، سوت ۇكىمى وقىلعاننان كەيىن.
حالىق ءارتيسىنىڭ بۇل سوزدەرى بۇقارالىق اقپارات قۇرالدارىندا اشىق جاريا بولدى. كەڭىنەن تارادى.
جاقىندا قازاقستاننىڭ حالىق ءارتيسى تۇڭعىشباي جامانقۇلوۆتىڭ ەلباسىنا ءۇشبۋ حات جازىپ، ارتىق اۋىز سويلەپ قويعانى ءۇشىن كەشىرىم سۇراعانى بەلگىلى بولدى.
اسا قۇرمەتتى پرەزيدەنت مىرزا!
قىمباتتى نۇرسۇلتان ءابىشۇلى!
قادىرلى نۇر-اعا!
قولىما قالام الدىرىپ، سىزگە وسى حاتتى جازۋىما ماجبۇرلەگەن ءبىرىنشى سەبەپ – ول سىزگە دەگەن ەرەكشە ىقىلاسىم مەن ادال نيەتىم. سونان سوڭ، سوڭعى كەزدەردەگى الەۋمەتتىك جەلىلەردە شۋلاپ كەتكەن وقيعاعا دەگەن تەرىس جانە كەلىسپەۋشىلىك كوزقاراسىم.
مينيستر ا.مۇحامەديۇلىمەن ارامىزداعى جۇمىس بارىسىندا تۋعان ايتىستارىمىزدىڭ قوعامدا ەتەك الىپ، ونى كەيبىر تەرىس پيعىلدى وپپوزيتسيا وكىلدەرىنىڭ ۋشىقتىرىپ جاتقانىنا قاتتى وكىنە وتىرىپ، مەنى ءسىزدىڭ الدىڭىزدا ۇياتقا قالدىرعانىنا جەر بولىپ وتىرمىن.
وسى ءبىر ىڭعايسىز جايتقا بايلانىستى، الدىڭىزدا باسىمدى ءيىپ، وزىڭىزدەن كەشىرىم سۇرايمىن. مەنەن ۇلكەن اعاتتىق كەتتى، تاپ وسىلاي بولادى دەپ ويلاماپپىن.
ەلىمە، وزىڭىزگە دەگەن ىزگى، تازا نيەتىمنىڭ جۇمىس بارىسىنداعى تۇسىنىسپەۋشىلىككە بوي ۇرعانىنا قاپالىمىن. مينيستر ەكەۋىمىز ۇعىنىسارمىز، ىسكەر جىگىت قوي.
تەك ءسىز مەيىرىمدىلىك جاساپ، ماعان وكپە ارتپاۋىڭىزدى ءوتىنىپ سۇرايمىن.
مەنى كەشىرىڭىز، اعا!!
ءسىزدى قۇرمەتتەۋشى ءىنىڭىز تۇڭعىشباي جامانقۇلوۆ
اسەت قۋاندىقوۆ
P.S. رەداكتسيامىزدىڭ پوشتاسىنا بەيمالىم وقىرماننان وسىنداي حات كەلىپ ءتۇستى. "ادىرنا" ۇلتتىق پورتالى بەيتاراپ پوزيتسيا ۇستاناتىنىن، اۆتوردىڭ پىكىرى رەداكتسيا كوزقاراسىن بىلدىرمەيتىنىن تاعى دا ەسكەرتە كەلىپ، قارسى تاراپتىڭ ايتار پىكىرىن دە جاريالاۋعا دايىنبىز.
بۇل حات شىن مانىندە تۇڭعىشباي جامانقۇلوۆقا تيەسىلى مە، الدە ارانداتۋشى ادامداردىڭ كەزەكتى ايلا-شارعىسى ما؟ ونىڭ اق-قاراسىن الداعى ۋاقتا تۇڭعىشباي جامانقۇلوۆتىڭ وزىنەن سۇراپ بىلەتىن بولامىز.
قۇرمەتپەن ءسىزدىڭ "ادىرناڭىز"
