مەملەكەتتىك قۋىرشاق تەاترىنا جاڭا جىل قارساڭىندا ەرەكشە كۇتىمدى قاجەت ەتەتىن بالالار مەن كوپبالالى، از قامتىلعان وتباسىلاردىڭ بالالارىنا ارنالعان قايىرىمدىلىق سپەكتاكلىنىڭ كورسەتىلىمى ءوتتى.
قايىرىمدىلىق اكتسياسى اياسىندا جاس كورەرمەندەرگە ارنالعان «مۋلتي جاڭا جىل» اتتى مەرەكەلىك باعدارلاما ۇسىنىلدى.
باعدارلاما بارىسىندا بالعىن بۇلدىرشىندەر مۋلتعالامعا قىزىقتى ساياحات جاساپ، اياز اتا، اقشاقار، نارۋتو، پيكاچۋ، ستيچ، كيكي سىندى سۇيىكتى كەيىپكەرلەرىمەن بىرگە ينتەراكتيۆتى ويىندار مەن ساحنالىق كورىنىستەرگە قاتىسۋ مۇمكىندىگىنە يە بولدى. سونىمەن قاتار، كورەرمەندەر نازارىنا «ەتىك كيگەن مىسىق» سپەكتاكلى ۇسىنىلدى.
اتالعان شارانىڭ باستى ماقساتى – بالالاردى تەاتر ونەرىمەن جاقىن تانىستىرىپ، جاڭا جىل قارساڭىندا مەرەكەلىك كوڭىل كۇي مەن جاعىمدى ەموتسيا سىيلاۋ.
قايىرىمدىلىق اكتسياسى «زەرە»، «كۇمىس عاسىر»، «ايالا»، «سەنىم»، «انا تىلەگى»، «ەرەكشە تاڭداۋ شەلەك» الەۋمەتتىك ورتالىقتارى مەن قورلارىنىڭ قولداۋىمەن ءوتتى. ءىس-شارا اياسىندا بالالار مەرەكەلىك باعدارلامانى تاماشالاپ قانا قويماي، «ديززي» كومپانياسىنىڭ دەمەۋشىلىگىمەن ۇسىنىلعان «Riksamin C Vitamin» سۋسىندارىن سىيعا الدى.
«بالالاردىڭ ونەر مەن مەرەكەلىك اتموسفەرانى سەزىنۋى – تەاتردىڭ ماڭىزدى الەۋمەتتىك مىندەتتەرىنىڭ ءبىرى. وسىنداي شارالار ارقىلى ءبىز ولاردىڭ جۇرەگىنە قۋانىش سىيلاۋعا تىرىسامىز»، – دەدى الماتى قالاسىنىڭ مەملەكەتتىك قۋىرشاق تەاترىنىڭ ديرەكتورى المات امانگەلدى.
ايتا كەتەيىك، مەملەكەتتىك قۋىرشاق تەاترىنداعى جاڭا جىلدىق سپەكتاكل مەن مەرەكەلىك باعدارلامالار 18 جەلتوقساننان باستاپ 4 قاڭتارعا دەيىن كورەرمەندەر نازارىنا ۇسىنىلادى.
