سىبايلاس جەمقورلىققا قارسى قىزمەت قر ۇلتتىق مۋزەيىنىڭ ديرەكتورى ا.مۇحامەديۇلىنا (قر مادەنيەت جانە سپورت ەكس-ءمينيسترى) جانە وزگە ادامدارعا قاتىستى بيۋدجەت قاراجاتىن اسا ءىرى مولشەردە ۇرلاۋ فاكتىلەرى بويىنشا تەرگەۋ جۇرگىزىپ جاتىر. ولار ارىستان مۇحامەديۇلىنىڭ قىزمەتىنە قاتىستى تىڭ دەرەكتەردى ۇسىندى، دەپ حابارلايدى “ادىرنا” ۇلتتىق پورتالى.
اگەنتتىك تاراتقان اقپاراتقا سۇيەنسەك, جۇرگىزىلىپ جاتقان تەرگەۋ اياسىندا ا. مۇحامەديۇلىمەن جانە باسقالارمەن ءسوز بايلاسىپ، "الەم مۇراجايلارى بويىنشا التىن ادامنىڭ شەرۋى" حالىقارالىق كورمەسىنىڭ جوباسىن ىسكە اسىرۋ كەزىندە 221 ميلليون تەڭگە سوماسىندا سەنىپ تاپسىرىلعان بيۋدجەت قاراجاتىن ۇرلاۋعا قاتىسقان "قر ۇلتتىق مۇراجايى" رمقك ديرەكتورىنىڭ بۇرىنعى ورىنباسارى الماس نۇرازحان ۇستالدى.
"استانا قالاسىنىڭ مامانداندىرىلعان اۋدانارالىق تەرگەۋ سوتىنىڭ سانكتسياسىمەن ا.ش. نۇرازحان 2 اي مەرزىمگە قاماۋعا الىندى", - دەپ حابارلادى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى.
قازىرگى ۋاقىتتا بۇل ىسكە قاتىستى تولىققاندى تەرگەۋ ءجۇرىپ جاتىر.
“ادىرنا” ۇلتتىق پورتالى
