"پارا الدى" دەپ ايىپتالعان الماتى وبلىسىنداعى ەسىك قالاسىنىڭ بۇرىنعى اكىمى ايىپپۇل ارقالادى، دەپ حابارلايدى "ادىرنا" ءتىلشىسى Tengrinews.kz-كە سىلتەپ.
ءىس ماتەريالدارىنا سايكەس، ەسىكتىڭ اكىمى اسحات اڭساتباەۆ سەرىكتەستىكپەن 32 ميلليون تەڭگەگە بالالار الاڭدارىن اباتتاندىرۋ تۋرالى شارت جاساسقان. مەردىگەر مەكەمەنىڭ باسشىسى جۇمىستى ورىنداۋ ءۇشىن ءوزىنىڭ دوسى ر. ەسىمدى ازاماتپەن بىرلەسكەن.
ەسىكتىڭ ەكس-اكىمى 2023 جىلدىڭ تامىز ايىندا قۇرىلىستاردىڭ بىرىنە بارىپ، جۇمىس ساپاسىنا قاتىستى ەسكەرتۋلەر ايتىپ، ولاردى جويۋدى تالاپ ەتكەن. الايدا مەردىگەر ر. ازامات اكىممەن دوستىق قارىم-قاتىناس ورناتۋ ماقساتىندا تۋعان كۇنىنە قۇنى 234 مىڭ تەڭگە بولاتىن قىمبات سومكە سىيلاعان.
اكىم بۇل ارەكەتتەن سوڭ كاسىپكەر تاراپىنان ورىندالعان جۇمىستاردىڭ قالعان اكتىلەرىنە كەدەرگىسىز قول قويعان. سونداي-اق، باسشى جۇرگىزىلگەن جۇمىستار ءۇشىن قوسىمشا اقشا الۋ مۇمكىندىگىن ۇسىنىپ، كاسىپكەردەن 2 ميلليون تەڭگە سوماسىندا پارا دامەتكەن. 2023 جىلعى 6 قازاندا راحمەتوۆ اتالعان قاراجاتتى انساتباەۆقا ونىڭ ورىنباسارى ارقىلى بەردى.
سوت پروتسەسىندە ەكى سوتتالۋشى دا ءوز كىناسىن مويىندادى. ەكس-اكىم بۇل ارەكەتكە وكىنەتىنىن ايتىپ، باس بوستاندىعىنان ايىرماۋدى سۇراعان.
7 اقپاندا سوت ۇكىمى بويىنشااسحات اڭساتباەۆ "پارا الدى" دەپ ايىپتالىپ، العان سوممانىڭ 50 ەسەلەنگەن كولەمىن، ياعني 100 ميلليون تەڭگە مولشەرىندە ايىپپۇل تۇرىندەگى جازا ارقالادى. سونداي-اق، شەنەۋنىك مەملەكەتتىك قىزمەتپەن اينالىسۋ قۇقىعىنان ءومىر بويىنا ايىرىلدى.
ال كاسىپكەر راحمەتوۆ 367-باپقا سايكەس "پارا بەرۋ" بويىنشا كىنالى دەپ تانىلىپ، وعان 13 ەسە، ياعني 60 ميلليون تەڭگە كولەمىندە ايىپپۇل تاعايىندالدى.
سوت ۇكىمى ءالى زاڭدى كۇشىنە ەنگەن جوق.
