اقمولا وبلىسىنىڭ ىنتىماق اۋىلىندا 14 جاستاعى قىز پىشاق جاراقاتتارىنان كوز جۇمدى، دەپ حابارلايدى "ادىرنا" ۇلتتىق پورتالى.
وبلىستىق پوليتسيا دەپارتامەنتىنىڭ مالىمەتىنشە، ءجاسوسپىرىمنىڭ ولىمىنە قاتىستى سوتقا دەيىنگى تەرگەۋ باستالدى.
“ىنتىماق اۋىلىندا 14 جاستاعى قىز پىشاق جاراقاتتارىنان كوز جۇمدى. كۇدىكتىنىڭ جەكە باسى جەدەل انىقتالدى. قازىرگى ۋاقىتتا ونى ۇستاۋعا باعىتتالعان جەدەل-ىزدەستىرۋ شارالارى جۇرگىزىلۋدە”، – دەلىنگەن ۆەدومستۆو حابارلاماسىندا.
پوليتسيا دەپارتامەنتى باسشىلىعى تەرگەۋ بارىسىن ەرەكشە باقىلاۋعا العان. قىز ولىمىنە قاتىستى بارلىق ءمان-جاي انىقتالىپ جاتىر.
كوپ ۇزاماي پوليتسەيلەر قىلمىستى جاسادى دەگەن كۇدىكپەن ەر ادامدى ۇستادى.
“قىلمىس جاساعاننان كەيىن ەر ادام قاشىپ كەتۋگە تالپىنعان، الايدا جەدەل ارەكەت ەتۋ بارىسىندا ءىزىن سۋىتپاي قولعا ءتۇستى. قازىر كۇدىكتى ۋاقىتشا ۇستاۋ يزولياتورىنا قامالدى. تەرگەۋ جالعاسىپ جاتىر”، – دەپ حابارلادى پوليتسيا دەپارتامەنتى.
وقيعانىڭ سەبەپتەرى مەن ناقتى جاعدايلارى انىقتالىپ، ءتيىستى ساراپتامالار تاعايىندالعان.
