“قايعىلى قاڭتار” قايتالانباۋ ءۇشىن تۇركى بىرلىگىن ساقتاۋىمىز كەرەك. ءبىزدى، تاۋەلسىزدىكتى ساقتايتىن تۇركى بىرلىگى. بۇل پىكىردى بەلگىلى ەكونوميست، قوعام قايراتكەرى جانۇزاق اكىم “ادىرنا” ۇلتتىق پورتالىنا ايتىپ بەردى.
“وسىدان ءبىر جىل بۇرىن بارىمىزگە بەلگىلى “قايعىلى قاڭتار وقيعاسى” بولدى. بۇل قازاق حالقى ءۇشىن وتە قايعىلى 238 ادامنىڭ ءومىرىن قيعان وقيعا بولدى. بۇل ارينە، اياق استىنان شىقتى. جاڭاوزەندە مۇناي مەن گاز قۇنىنىڭ كوتەرىلۋىنەن باستالدى. بىراق الماتىعا، وڭتۇستىك وڭىرگە كەلگەندە جاپپاي ۇيىمداسقان قىلمىستىق توپتار كىرىستى. بۇل ماسەلەنى ءبىز ەموتسيامەن شەشە المايمىز. ونى ءتۇسىنۋ كەرەك. بۇل - ءبىر.
ەكىنشى، قايعىلى وقيعا ءالى تەكسەرىلىپ بولعان جوق. وسى جاڭا جىلدىڭ الدىندا باس پروكۋراتۋرانىڭ قىزمەتكەرلەرى ازاتتىققا بەرگەن سۇحباتىندا “پروكۋراتۋرا وزىنشە تەكسەرىپ جاتىر، ىشكى ىستەر مينيسترلىگى وزىنشە، ۇلتتىق قاۋىپسىزدىك كوميتەتى وزدەرىنشە تەكسەرىپ جاتىر” دەيدى. ءبىز بارلىعىن تەكسەرىپ الماي، ونىڭ جاۋابىن بەرە المايمىز.
“ەلىمىز “قاڭتار قاسىرەتىنەن كەيىن بىرنەشە ساباق الدى. ادامدارىمىزدان ايىرىلىپ، جۇرەگىمىز قان جىلادى. حالىقتىڭ بيلىككە دەگەن ىزاسى بايقالدى. مۇنىڭ بارلىعىن قايتا بولدىرماۋىمىز كەرەك؟ ول ءۇشىن نە ىستەيمىز؟
بىرىنشى، بىزدە ۇلت بىرلىگى بولۋى كەرەك. ول الدىمەن، قازاقتىڭ بىرىگۋى، سوسىن قازاق قازاقستاندىقتاردى بىرىكتىرۋ كەرەك. سوندا ەل بىرىگەدى. ەكىنشى، بيلىك ۇلتتىق مەملەكەتتى مويىنداپ، سونىڭ مۇددەسىنە جۇمىس جاساعاندا عانا قوعام داميدى. ودان باسقا قازاق ءبىر جاققا، بيلىك ءبىر جاققا تارتىپ، قوعام دامىمايدى. ۇشىنشى، تۇركى بىرلىگى. ءبىزدى، تاۋەلسىزدىكتى ساقتايتىن تۇركى بىرلىگى”، - دەدى جانۇزاق اكىم.
