2024 جىلعى 26 جەلتوقساندا الماتى گارنيزونىنىڭ اسكەري سوتىندا قاڭتار وقيعاسى كەزىندە اتىلعان ەرلان جاعىپاروۆ پەن اۋەز قاپسالانوۆتىڭ ولىمىنە قاتىستى سوت-مەديتسينالىق ساراپشىلاردىڭ ەسەپتەرى تىڭدالدى، دەپ حابارلايدى "ادىرنا" ۇلتتىق پورتالى "ۆلاست" رەداكتسياسىنا سىلتەمە جاساپ.
ەكى ازامات 2022 جىلعى 6 قاڭتاردا الماتىداعى رەسپۋبليكا الاڭىندا وققا ۇشقان. بۇل وقيعا بويىنشا كۇدىكتى رەتىندە ۇلتتىق گۆارديانىڭ 5571 اسكەري ءبولىمىنىڭ تاربيە جانە الەۋمەتتىك-قۇقىقتىق جۇمىسى جونىندەگى ورىنباسارى ايتجان اۋباكىروۆ جاۋاپقا تارتىلۋدا. ول «قىزمەتىن اسىرا پايدالانۋ» بابى بويىنشا ايىپتالىپ وتىر.
سوت وتىرىسىندا ساراپشىلار ەكى ازاماتتىڭ دەنەسىنەن تابىلعان جاراقاتتار تۋرالى مالىمەت بەردى.
35 جاستاعى اۋەز قاپسالانوۆ ءتورت وق جاراقاتىن العان.
جاراقاتتار وڭ قولىندا، ارقاسىندا ەكى، اياعىندا ءبىر رەت تىركەلگەن. ساراپشى جاراقاتتاردىڭ جاقىن قاشىقتىقتان ەمەس، الىس ارالىقتان جاسالعانىن، بىراق ناقتى اراقاشىقتىقتى انىقتاۋ مۇمكىن بولماعانىن ايتتى.
ەرلان جاعىپاروۆتىڭ دەنەسىنەن 13 جاراقات تابىلعان، بىراق ساراپشى كەيبىر جاراقاتتار تۋرا وق تيگەننەن ەمەس، جاناما سوققىدان بولعانىن اتاپ ءوتتى.
ونىڭ دەنەسىندە اۆتومات دۇمىمەن ۇرعان سوققى ىزدەرى انىقتالعان. 10 وق جاراقاتىنىڭ ىشىندە كىرەتىن، جاناما، شىعاتىن جانە تۇيىق جاراقاتتار بار. دەنەدە قالعان ءۇش وق جاراقاتى تىركەلگەن. جاراقاتتار دەنەنىڭ ءارتۇرلى ايماقتارىندا: اۋىز، كەۋدە قۋىسى، ارقا، قولتىق، بىلەك، جامباس، تىزە جانە يىق ايماقتارىندا بولعان. بارلىق جاراقاتتار ءتىرى كەزىندە سالىنعانى انىقتالدى.
ءىس بويىنشا سوت تالقىلاۋى 2024 جىلدىڭ 18 جەلتوقسانىندا باستالعان. الداعى سوت وتىرىستارىندا تەرگەۋ ماتەريالدارى مەن كۋاگەرلەردىڭ ايعاقتارى قارالۋى جوسپارلانعان.
ايىپتالۋشى ايتجان اۋباكىروۆ ءوزىنىڭ كىناسىزدىگىن دالەلدەۋگە تىرىسۋدا. بۇل ءىس قاڭتار وقيعاسى كەزىندە كۇشتىك قۇرىلىمدار تاراپىنان جاسالعان ارەكەتتەرگە قاتىستى قوعامنىڭ ەرەكشە نازارىندا تۇر.
