قاڭتار وقيعاسى بويىنشا ايىپتالعان بەلسەندى قالاس نۇرپەيىسوۆ وزىنە قول جۇمسادى. بۇل جونىندە 25 قاراشادا ادۆوكات جالعاس ساپارحانوۆا جۋرناليست دۋمان مۇحاممەدكارىمنىڭ YouTube-تاعى «نە دەيدى» ارناسىندا جاريالادى، دەپ حابارلايدى “ادىرنا” ۇلتتىق پورتالى «ازاتتىق راديوسىنا” سىلتەپ.
ارنانىڭ حابارلاۋىنشا، نۇرپەيىسوۆتىڭ وزىنە قول جۇمساۋىنا «تەرگەۋ ورگاندارىنىڭ قىسىمى سەبەپ بولعان.
ادۆوكات ارنادا نۇرپەيىسوۆ جازدى دەلىنگەن حاتتىڭ ەلەكتروندى كوشىرمەسىن كورسەتىپ، مازمۇنىن باياندايدى.
«حاتتا نۇرپەيىسوۆ جەدەل تەرگەۋ توبىنىڭ وزىنە «تەرروريست» (269-باپ، 3-بولىك), «ۇيىمداستىرۋشى» (272-باپ 1-بولىك) دەپ ايىپ تاعىپ جاتقانىن، بۇل ءىس بويىنشا كىناسىز ەكەنىن، وزىنە قول جۇمساعانىن ايتىپ كورسەتكەن»، - دەدى جالعاس ساپارحانوۆا.
ادۆوكاتتىڭ ايتۋىنشا، بەلسەندى وزىنە 24 قاراشادا قول جۇمساپ، سول جاق قولىنىڭ تامىرىن كەسكەن. بۇدان سوڭ اۋرۋحاناعا جەتكىزىلىپ، تامىرى تىگىلگەن. قازىر ونىڭ جاعدايى ورتاشا ەكەنى ايتىلادى.
ال تەرگەۋشى داۋرەن جەتىمبەكوۆ ادۆوكاتقا نۇرپەيىسوۆتى قاراۋىلمەن قالالىق پروكۋراتۋراعا جەتكىزەتىنىن ايتقان. ادۆوكات يزولياتوردىڭ مەديتسينالىق بولىمىنە حابارلاسقانمەن ازىرگە جاۋاپ الا الماعانىن ايتتى.
ازاتتىق ءتىلشىسى جۇما كۇنى كەشكە الماتىداعى Cي-18 تەرگەۋ يزولياتورىنا حابارلاستى. مەكەمەنىڭ كەزەكشى بولىمىندە وتىرعان ءوزىن انەليا (فاميلياسى دۇرىس ەستىلمەدى) دەپ تانىستىرعان قىزمەتكەر «تەلەفونمەن اقپارات بەرە المايتىنىن، مەكەمەگە بارۋ قاجەتتىگىن» ايتتى.
ادۆوكات جالعاس ساپارحانوۆانىڭ ايتۋىنشا، تاريح ءپانىنىڭ مۇعالىمى، بەلسەندى قالاس نۇرپەيىسوۆكە ءتورت باپ بويىنشا ايىپ تاعىلعان: ەكى باپ (191-باپ، 2-بولىك، 200-باپ، 2-بولىك) بويىنشا ايىپ امنيستيامەن قىسقارۋى ءتيىس. ال «عيماراتقا باسىپ كىرۋ» (269-باپتىڭ 3-بولىگى) جانە «جاپپاي تارتىپسىزدىك» (272-باپ، 1-بولىك) باپتارى امنيستياعا ىلىنبەيدى.
بۇعان دەيىن قالاس نۇرپەيىسوۆ پەن بەلسەندى ايگەرىم تىلەۋجانعا قاڭتار وقيعاسى كەزىندە «اۋەجايدى باسىپ الماق بولدى» دەگەن ايىپ تاعىلعانى حابارلانعان. اقپاراتقا قاراعاندا، تىلەۋجانوۆا دا، نۇرپەيىسوۆ تە سول كۇنى اۋەجايعا بارعانىن مويىنداعان، بىراق تەرگەۋ تاققان ايىپتاردى جوققا شىعارادى. ادۆوكات جالعاس ساپارحانوۆانىڭ ايتۋىنشا، قالاس نۇرپەيىسوۆ 5 قاڭتاردا «بولىپ جاتقان نارسەنى بولاشاق تاريح» دەپ اتاپ، وقيعانى زەرتتەۋ ءۇشىن، ءوز كوزىمەن كورۋ ءۇشىن اۋەجايعا بارعان.
