قاڭتار وقيعاسىندا قاۋىرت بايانداما جاساپ، حالىقتىڭ كارىنە ۇشىراعان ەنەرگەتيكا ءمينيسترى ماعقۇم مىرزاعاليەۆىڭ بۇرىنعى شتاتتان تىس كەڭەسشىسى ولجاس ءبايدىلدينوۆ ەش ەتيكالىق جاۋاپقا تارتىلعان جوق. قوعام بەلسەندىسى اسان اناربايدىڭ ايتۋىنشا، مينيستر كەڭەسشىسى ەل ىشىندەگى ماسەلەگە باس اۋىرتپاعان. قايتا ونىڭ جالاڭ كەكەسىنى حالىقتىڭ اشۋىنا ءتيىپ، ودان سايىن جالپاق جۇرتتى ىزالاندىرعان، دەپ حابارلايدى "ادىرنا" ۇلتتىق پورتالى.
قوعام بەلسەندىسى، جۋرناليست ءوزىنىڭ ءبىر جىل بۇرىنعى جازباسىن تىكە تارتىپ، اتقاقونارلاردىڭ ەل تۇرمىسى، حالىق تىرلىگىنەن مۇلدەم بەيحابار، ىرگەسىن اۋلاق سالعان ءوز الدىنا بولەك ءبىر توپ ەكەندىگىن جەتكىزدى.
- جاڭاوزەندەگى نارازىلىقتىڭ جالپىحالىقتىق تولقۋعا ۇلاسۋىنا كوممۋنيكاتسيادان جۇرداي مينيستر مەن ونىڭ ويلانباي سويلەگەن كەڭەسشىسىنىڭ دە ۇلەسى بار. قاڭتاردىڭ باسى باتىس جۇرتى باس كوتەردى. بۇلىكقۇمارلىقتان ەمەس، قوس بۇيىردەن قىسقان قىمباتشىلىقتان. مۇناي-گازدىڭ ۇستىندە وتىرىپ اربا وتىنى اسپانداعاننان. 3 قاڭتار كۇنى اڭداتپاسى ىرىڭ-جىرىڭداپ، اقىرى ورتكوم ورتالىق كوممۋنيكاتسيالار قىزمەتى الاڭىندا وتكەن بريفينگكە ەنەرگەتيكا ءمينيسترى ماعقۇم مىرزاعاليەۆ پەن ونىڭ ءبىر توپ نوكەرى شىقتى. بريفينگتە ءجۋرناليستىڭ ۇشتەن بىرىنە عانا سۇراق قويدىردى. تسەنزۋرانىڭ اۋى كەڭىنەن ءتۇرىلدى. ءمينيستردىڭ ءسوزى بەلگىلى، باعا 90-85 تەڭگەدەن تۇسپەيدى، وزىندىك قۇنىنىڭ ءوزى 70 تەڭگەدەن جوعارى دەپ تۇرىپ الدى. ال ونىڭ كەڭەسشىسى ولجاس ءبايدىلدينوۆ مۇناي سالاسىندا ساراپشى بولعانىمەن، ونى وندىرەتىن مۇنايشىلاردىڭ ەڭبەگى مەن تۇرمىسىنان مۇلدە بەيحابار، حالىقتان الىستىعىن كورسەتتى. ونىڭ ءسوزى نارازىلار مەن جاڭاوزەندىكتەردى ابدەن اشىندىردى. ءبىر اپتا جاڭاوزەندە ءجۇرىپ وسىعان كوزىم جەتتى، - دەپ جازدى جۋرناليست.
اۆتور كەيىننەن حالىققا قىزمەت ەتىپ، ەل مۇددەسىنە ەڭبەك سىڭىرسەم دەگەن ازاماتتىڭ بولمىسى، تۇلعالىق بيىكتىگى قانداي بولۋى ءتيىس دەگەن سۇراقتىڭ توڭىرەگىندە ءسوز قوزعايدى. ونىڭ ايتۋىنشا، مينيستر كەڭەسشىلەرىنىڭ ويقايتاي وتىرىپ، ويلانباي سويلەۋى حالىقتى قاتتى اشىندىرىپ، كوتەرىلىستى ورشەلەندىرگەن. ءوز ويىن وتكىر، پايىمىن باتىل جەتكىزگەن جۋرناليست:
- 37 جاستاعى شتاتتان تىس كەڭەسشىنىڭ جاڭاوزەن تۋرالى وقىراڭدانا ايتقان پايىمى قاتە. ساراپشىعا لايىق شىنداپ زەرتتەمەي سويلەدى. جۇرتتى اشىندىردى. نارازىلىققا ادەكۆات جاۋاپ بولار دەگەندە ەل قاراعان اۋىزدان وسىنداي ءسوز شىقتى. نارازىلىقتىڭ جالپىحالىقتىق تولقۋعا ۇلاسۋىنا سەبەپ بولعان العىشارتتىڭ ىشىندە مىرزاعاليەۆ پەن ءبايدىلدينوۆتىڭ ويلانباي سويلەگەن ءسوزى دە وبال ارقالادى دەپ ەسەپتەيمىن. وسىلايشا، ءورت سوندىرمەسە دە لەبىن باسەڭدەتەر تۇستا وزىمشىلدىكپەن ورشەلەندىرىپ الدى. ءسويتىپ، قاڭتاردىڭ 4-نەن كەيىن ءبۇتىن ەل تۇردى، ارتى الدەبىر كۇشتەر پايدالانىپ ەلدى ويرانعا ۇشىراتتى.بۇل حالىق الدىنا شىعاتىن مەملەكەتتىك قىزمەتكەرلەردىڭ ازاماتتاردىڭ الەۋمەتتىك ومىرىنەن تىم الشاقتاي تۇسكەنىن، شەنەۋنىك پەن بۇقارا اراجىگىنىڭ الىستاپ-سۋىنىپ كەتكەنىن كورسەتەدى. كريزيستى شەشۋدىڭ ورنىنا، ۇستىنە ماي توگىپ الاتىنداردى بولاشاق تۇلەكتەرى، وزگە دە ءبىلىمدى ءارى بىلىكتى ماماندار اۋىستىرسا ەكەن. كادرلىق رەزەرۆتىڭ ىسكە جارار كۇنى تۋدى دەگەن وسى بولار. مىنا كەڭەسشىنىڭ كوپ مۇددەسىنە تۇكىرە قاراعانى ءۇشىن ونى قايتا جاساقتالاتىن ۇكىمەتكە جۋىتپاۋدى تالاپ ەتەمىن (جەكە سۋبەكتيۆتى پىكىرىم), - دەپ جازدى.
