گەنەرال سەرىك كۇدەباەۆ قاڭتار وقيعاسى بويىنشا كۇدىكتىلەر تىزىمىنە ەندى. بۇل تۋرالى باس پروكۋراتۋرا مالىمدەدى، دەپ حابارلايدى “ادىرنا” ۇلتتىق پورتالى.
"قازىرگى ۋاقىتتا وبلىستىق پوليتسيا دەپارتامەنتىنىڭ لاۋازىمدى تۇلعالارىنا قاتىستى قىلمىستىق كودەكستىڭ 370 بابىنىڭ 4 بولىگىنىڭ 1 تارماعىمەن "اۋىر زارداپتارعا الىپ كەلگەن قىزمەتىندەگى ارەكەتسىزدىك" بويىنشا تەرگەۋ امالدارى جۇرگىزىلىپ جاتقانىن جانە وعان كۇدەباەۆ سەرىك مىرزاقۇلۇلى كۇدىكتى بولىپ تانىلعانىن مالىمدەيمىز", - دەلىنگەن مالىمەتتە.
مۇنىمەن قوسا قىلمىستىق ءىس جۇرگىزۋ كودەكسىنىڭ 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريا ەتىلۋگە جاتپايتىنى، "سوندىقتان قويىلعان سۇراقتارعا تولىق جاۋاپ بەرۋ مۇمكىن ەمەستىگى" اتالىپ وتىلگەن.
ەسكە سالايىق، بۇعان دەيىن ىشكى ىستەر مينيسترلىگى پوليتسيا گەنەرال-مايورى سەرىك كۇدەباەۆتىڭ الماتى وبلىسى بويىنشا پوليتسيا دەپارتامەنتى باسشىلىعىنان بوساتىلۋى تۋرالى اقپارات تاراتقان. ۆەدومستۆونىڭ مالىمەتىنشە، كۇدەباەۆ قىزمەتىنەن ءوز ەركىمەن كەتكەن.
”ادىرنا” ۇلتتىق پورتالى
