پوليتسيا قىزمەتكەرلەرى وسكەمەن قالاسىنداعى كوللەدج ستۋدەنتىن اياۋسىز سوققىعا جىققاندارعا قاتىستى تەرگەۋ امالدارىن جۇرىگىزۋدى باستادى. وقيعا بەينەكادرلارىن الەۋمەتتىك جەلىدە تاراتىپ، اقپارات اينالىمىنا سالعان "ايتاقشىلاردىڭ" دا قىلمىستىق جاۋاپكەرشىلىككە تارتىلاتىنى ايتىلدى، دەپ حابارلايدى "ادىرنا" ۇلتتىق پورتالى.
وسكەمەن قالالىق پوليتسياسى كامەرا الدىندا قۇربىسىن كۇشتەپ شەشىنۋگە ماجبۇرلەگەن ءبىر توپ ءجاسوسپىرىم قىزدىڭ ارەكەتىن ۆيدەوعا ءتۇسىرىپ، ونى تاراتۋ فاكتىسى بويىنشا قىلمىستىق ءىس قوزعالعانىن مالىمدەدى. بۇل جايلى Yk-news جازدى.
"بۇل ماتەريالداردى زاڭسىز تاراتۋ فاكتىسى بويىنشا قىلمىستىق ءىس قوزعالدى. وسى قىلمىستىق ءىس شەڭبەرىندە وعان قاتىسى بار ادامدار انىقتالىپ، قىلمىستىق جاۋاپكەرشىلىككە تارتىلاتىن بولادى", - دەدى جەرگىلىكتى پوليتسيا قىزمەتى باسقارماسىنىڭ ەرەكشە تاپسىرمالار جونىندەگى اعا ينسپەكتورى، پوليتسيا مايورى ايگەرىم بەيسەمباەۆا.
ءجاسوسپىرىمدى جابىرلەۋشى توپتا كوللەدج ستۋدەنتتەرىمەن قوسا مەكتەپ وقۋشىلارى دا بولعان. ولارعا قاتىستى شقو پروكۋراتۋراسىنىڭ قوعامدىق مۇددەلەردى قورعاۋ باسقارماسىنىڭ پروكۋرورى ساۋلە گۋباشەۆا اقپارات ءبولىستى:
"سەگىز ءجاسوسپىرىم انىقتالدى. بەسەۋى - ءارتۇرلى كوللەدجدىڭ ستۋدەنتتەرى جانە ءارتۇرلى مەكتەپتىڭ ءۇش وقۋشىسى دا بار، ولار بىرنەشە كۇن بويى جابىرلەنۋشىنى قورقىتىپ، قۋدالاپ، ۇرىپ-سوعىپ، ۆيدەوعا تۇسىرگەن".
ەستەرىڭىزگە سالا كەتەيىك، ءساۋىر ايىنىڭ باسىندا الەۋمەتتىك جەلىدە جاسوسپىرىمدەردىڭ قۇربىسىن سوققىعا جىعىپ، قورلاۋىن بەينەلەيتىن ۆيدەو تارادى. الايدا، بۇل فاكت ءبىر اي بۇرىن وسكەمەندەگى ساۋدا ورتالىقتارىنىڭ بىرىندە ورىن العانى بەلگىلى بولدى. تەرگەۋ امالدارى جالعاسىپ جاتىر.
"ادىرنا" ۇلتتىق پورتالى
