«استانا» ساياباعىندا قازاق حالقىنىڭ تاريحىندا، مادەنيەتىندە جانە ۇلتتىق تاعامدارىندا ەرەكشە ورىن الاتىن تارى داقىلىن ءوسىرۋ ءداستۇرىن ساقتاۋ مەن دارىپتەۋگە ارنالعان «اقتوبە – تارىنىڭ استاناسى» گاستروفەستيۆالى ءوتتى.
ءىس-شاراعا وبلىس اكىمى اسحات شاحاروۆ قاتىسىپ، فەستيۆالدىڭ كورمە الاڭدارىن ارالاپ كوردى، قاتىسۋشىلارمەن جانە قوناقتارمەن جۇزدەستى. سونداي-اق ۇلتتىق داستۇرلەردى ساقتاۋ مەن وڭىردە گاسترونوميالىق ءتۋريزمدى دامىتۋدىڭ ماڭىزدىلىعىنا توقتالدى.
اۋقىمدى شاراعا قالا تۇرعىندارى مەن قوناقتارى كوپتەپ جينالىپ، ءوڭىردىڭ باي مادەني جانە گاسترونوميالىق مۇراسىن تانىتاتىن جارقىن الاڭعا اينالدى.
فەستيۆال قوناقتارىنىڭ تارىدان دايىندالعان ەلۋگە جۋىق تاعام ءتۇرى ۇسىنىلعان كورمە-جارمەڭكە ەرەكشە قىزىعۋشىلىعىن تۋدىردى. قاتىسۋشىلار ۇلتتىق تاعامداردىڭ الۋان تۇرىمەن تانىسىپ، شوكولادتى جەنت ازىرلەۋ بويىنشا شەبەرلىك ساباعىنا قاتىسىپ، ءداستۇرلى باۋىرساق پەن ساماۋرىننان قۇيىلعان شايدان ءدام تاتتى.
كوپشىلىكتىڭ نازارى ايتەكە بي اۋدانىنىڭ ارنايى الاڭىنا ءتۇستى. مۇندا تارى ءوسىرۋ جانە وڭدەۋ تاريحىنا ارنالعان ەكسپوناتتار قويىلىپ، ءداندى داقىلدى ءداستۇرلى تاسىلمەن دايىنداۋ ۇدەرىسى كورسەتىلدى. كەلۋشىلەر اتاقتى تارىشى شىعاناق بەرسيەۆتىڭ قازاقستان اۋىل شارۋاشىلىعىن دامىتۋعا قوسقان ۇلەسى تۋرالى كەڭىرەك مالىمەت الىپ، وسى داقىلعا قاتىستى ۇلتتىق داستۇرلەردىڭ ەرەكشەلىكتەرىمەن تانىستى.
فەستيۆال اۋماعىندا حالىق شەبەرلەرىنىڭ قولونەر بۇيىمدارى كورمەسى دە ۇيىمداستىرىلدى. قوناقتار تەرىدەن، كيىزدەن، اعاشتان جانە جۇننەن جاسالعان اۆتورلىق جۇمىستاردى تاماشالاپ، زەرگەرلىك ونەر تۋىندىلارىمەن تانىستى جانە قولونەرشىلەر وتكىزگەن شەبەرلىك ساباقتارىنا قاتىستى.
گاستروفەستيۆال اياسىنداعى ماڭىزدى ءىس-شارالاردىڭ ءبىرى اۋىل شارۋاشىلىعى سالاسىنىڭ ماماندارىن، اگرونومداردى، قوعام وكىلدەرىن جانە ساراپشىلاردى بىرىكتىرگەن «اقتوبە – تارىنىڭ استاناسى» اتتى دوڭگەلەك ۇستەل بولدى. كەزدەسۋ بارىسىندا تارى ءوسىرۋ ءداستۇرىن جاڭعىرتۋ، ونىڭ پايدالى قاسيەتتەرى، سونداي-اق ءوڭىردىڭ اگرارلىق جانە گاسترونوميالىق الەۋەتىن دامىتۋ پەرسپەكتيۆالارى تالقىلاندى.
گاستروفەستيۆال ۇلتتىق تاعامداردى ناسيحاتتايتىن مەرەكەلىك شارا عانا ەمەس، مادەني مۇرانى دارىپتەۋگە، ءداستۇرلى ونىمدەرگە دەگەن قىزىعۋشىلىقتى ارتتىرۋعا جانە تاريحي جادىنى ساقتاۋعا باعىتتالعان ماڭىزدى الاڭعا اينالدى. ءىس-شارا قازاق حالقىنىڭ تاريحى مەن مادەنيەتىندەگى تارىنىڭ ەرەكشە ورنىن تاعى ءبىر مارتە ايقىنداپ، اقتوبە وبلىسىنىڭ وسى بىرەگەي داقىلدى دامىتۋداعى ماڭىزدى ورتالىقتاردىڭ ءبىرى ەكەنىن كورسەتتى.
