اقتوبەدە «جۇبانوۆ كوكتەمى» مۋزىكالىق اپتالىعى قورىتىندىلاندى

كورنەكتى قازاق كومپوزيتورى، ديريجەر جانە عالىم احمەت جۇبانوۆتىڭ 120 جىلدىعىنا ارنالعان «جۇبانوۆ كوكتەمى» مۋزىكالىق اپتالىعىنىڭ گالا-كونتسەرتى اۋقىمدى مادەني جوبانىڭ قورىتىندى ءىس-شاراسى بولدى. قورىتىندى كونتسەرت ونەر ورتالىعىندا ءوتىپ، ءبىر اپتا بويى وڭىردە ۇيىمداستىرىلعان ءىس-شارالاردىڭ ناتيجەسىن تۇيىندەدى.
 
مەرەكەلىك كەشتى اشقان وبلىس اكىمى اسحات شاحاروۆ احمەت جۇبانوۆ تۇلعاسىنىڭ ۇلت مادەنيەتىندەگى ايىرىقشا ءرولىن اتاپ ءوتتى.
 
«مەملەكەت باسشىسى قاسىم-جومارت توقاەۆ مادەنيەت پەن ونەردى دامىتۋ ەلدىڭ رۋحاني جاڭعىرۋىنىڭ نەگىزى ەكەنىن ۇنەمى اتاپ وتەدى. بۇل رەتتە ۇلتتىق مادەنيەتتىڭ كورنەكتى وكىلدەرىنىڭ مۇراسىن ساقتاۋ ەرەكشە مانگە يە. احمەت جۇبانوۆ – حح عاسىردىڭ اسا كورنەكتى تۇلعاسى، قازاقستانداعى كاسىبي مۋزىكالىق ونەردىڭ نەگىزىن قالاۋشى، عىلىم مەن شىعارماشىلىقتى ۇشتاستىرا بىلگەن ۇلى عالىم، كومپوزيتور ءارى ديريجەر. ونىڭ مۇراسى – حالقىمىزدىڭ رۋحاني بايلىعىنىڭ التىن قورى، ۇرپاقتان-ۇرپاققا جالعاساتىن ماڭگىلىك قۇندىلىق. «جۇبانوۆ كوكتەمى» اپتالىعى اياسىندا ونىڭ شىعارماشىلىعى مەن عىلىمي مۇراسىن ناسيحاتتاۋعا باعىتتالعان ءىس-شارالار كەڭ قولداۋ تاپتى. مۇنداي جوبالار جاستاردىڭ ۇلتتىق ونەرگە دەگەن قىزىعۋشىلىعىن ارتتىرىپ، مادەني مۇرانى ساقتاۋعا ىقپال ەتەدى»، – دەدى ءوڭىر باسشىسى.
 
مۋزىكالىق اپتالىق بارىسىندا وبلىستا ەلىمىزدىڭ جەتەكشى ۇجىمدارىنىڭ قاتىسۋىمەن كونتسەرتتەر، فەستيۆالدەر جانە شىعارماشىلىق كەزدەسۋلەر ۇيىمداستىرىلدى. ولاردىڭ قاتارىندا ەركەعالي راحماديەۆ اتىنداعى مەملەكەتتىك اكادەميالىق فيلارمونيا، جامبىل اتىنداعى قازاق مەملەكەتتىك اكادەميالىق فيلارمونياسى، سونداي-اق احمەت جۇبانوۆ اتىنداعى رەسپۋبليكالىق مامانداندىرىلعان مۋزىكا مەكتەپ-ينتەرناتى بار.
 
سونىمەن قاتار حالىقارالىق حور فەستيۆالى مەن دومبىراشىلار فەستيۆالى ءوتتى. ءىس-شارالارعا ەلىمىزدىڭ ءار وڭىرىنەن، سونداي-اق تۇركيا، وڭتۇستىك كورەيا جانە وزبەكستاننان كەلگەن قوناقتار مەن شىعارماشىلىق ۇجىمدار قاتىسىپ، اپتالىقتىڭ حالىقارالىق دەڭگەيىن ارتتىردى.
 
ايىرىقشا مانگە يە تاريحي ساتتەردىڭ ءبىرى – احمەت قۋانۇلى جۇبانوۆتىڭ ۇرپاقتارىنىڭ ءىس-شاراعا قاتىسۋى بولدى. بۇل ۇلتتىق مۋزىكالىق ونەردىڭ ساباقتاستىعى مەن تەرەڭ تامىرىن ايقىندايتىن باستى نىشانعا اينالدى.
 
گالا-كونتسەرتتە كاسىبي وركەسترلەر، حور ۇجىمدارى مەن جەكە ورىنداۋشىلار باس قوستى. باعدارلامادا احمەت جۇبانوۆتىڭ شىعارمالارىمەن قاتار قازاقستاندىق كومپوزيتورلاردىڭ تۋىندىلارى فولكلورلىق انسامبلدەردىڭ ورىنداۋىندا شىرقالدى.
 
كەش اياسىندا احمەت جۇبانوۆ اتىنداعى قازاق حالىق اسپاپتار وركەسترىنىڭ ارتىستەرىن ماراپاتتاۋ ءراسىمى ءوتتى. بىرقاتار مۋزىكانت قازاقستان رەسپۋبليكاسى مادەنيەت جانە اقپارات مينيسترلىگىنىڭ ماراپاتتارىنا، سونداي-اق وبلىس اكىمىنىڭ العىس حاتتارىنا يە بولدى.
 
كەش كوپشىلىك قاتىسقان ورتاق ونەرمەن قورىتىندىلانىپ، ساحنادا اعا بۋىن مەن جاس تولقىن، ءار ءتۇرلى باعىتتاعى ونەرپازدار ءبىر ارناعا توعىستى.