اتىراۋ قالاسىندا ماس كۇيدە وتباسىنىڭ شىرقىن بۇزىپ، ءوز ءۇيىن ورتەپ جىبەرمەك بولعان ەر ادام ىزدەستىرىلىپ جاتىر. ول ايەلى مەن 4 جاسار بالاسىنىڭ بەرەكەسىن العان. ءۇيدىڭ ەسىگىن بۇزىپ كىرىپ، ۇشى ۇشكىر زاتپەن ايەلىن قورقىتقان، كىشكەنتاي بالاسىنىڭ ۇرەيىن ۇشىرعان. قازىر ەر ادامنىڭ وتباسى "انالار ۇيىنە" ورنالاستىرىلدى، دەپ حابارلايدى "ادىرنا" ۇلتتىق پورتالى.
Polisia.kz ارناسىنىڭ حابارلاۋىنشا، 22 جەلتوقسان كۇنى ۋاقىت 21:12 شاماسىندا "102" ارناسىنا 1992 جىلى تۋعان ازاماتشا حابارلاسىپ، جولداسى ماس كۇيىندە ءۇيدىڭ ەسىگىن بۇزىپ كىرىپ، ۇشكىر زاتپەن قورقىتىپ جاتقانى جونىندە حابارلاما بەرگەن. اتالعان مەكەن-جايعا جەتكەن باتىس-58 ەكيپاجى ءۇيدىڭ ىشىنەن ءتۇتىن شىعىپ جاتقانىن بايقاپ، جەدەل تۇردە ارەكەت ەتۋمەن 1992 ج.ت. ازاماتشا مەن ونىڭ 4 جاستاعى بالاسىن قاۋىپسىز جەرگە شىعارىپ، ءورتتى اۋىزدىقتادى.
ال ماس كۇيدە كەلىپ، ايەلىن قورقىتىپ، ءۇيدى ورتكە وراعان ەر ازامات جانجال ۇستىندە پوليتسيا قىزمەتكەرلەرى كەلگەنشە وقيعا ورنىنان قاشىپ كەتكەن. اتالعان فاكتى بويىنشا پوليتسيا قىزمەتكەرلەرى 1992 جىلى تۋعان ازاماتشا مەن ونىڭ 4 جاستاعى قىزىن "انالار ۇيىنە" ورنالاستىردى.
قازىر شاڭىراعىنىڭ شىرقىن بۇزعان ەر ازاماتقا قاتىستى جەدەل-ىزدەستىرۋ جۇمىستارىن جۇرگىزىلىپ جاتىر.
"ادىرنا" ۇلتتىق پورتالى
