اقمولا وبلىسى قازاقستاننىڭ سولتۇستىك وڭىرلەرى اراسىندا كوكتەمگى ەگىس جۇمىستارىن العاش بولىپ تولىق اياقتادى. بيىلعى ناۋقان ءوڭىر اگرارشىلارى ءۇشىن تەك ۋاقىتپەن جارىس ەمەس، اۋىل شارۋاشىلىعىن جاڭعىرتۋعا باعىتتالعان ماڭىزدى كەزەڭگە اينالدى. ەگىس القاپتارىن ءارتاراپتاندىرۋ، تسيفرلىق تەحنولوگيالاردى ەنگىزۋ جانە قارجىلاندىرۋ تەتىكتەرىن ءتيىمدى پايدالانۋ ناتيجەسىندە كوكتەمگى دالا جۇمىستارى بەلگىلەنگەن مەرزىمنەن كەشىكپەي اياقتالدى.
وبلىستىق اۋىل شارۋاشىلىعى باسقارماسىنىڭ مالىمەتىنشە، بيىلعى ماۋسىم ناقتى جوسپارلاۋ مەن زاماناۋي تەحنولوگيالاردى كەڭىنەن قولدانۋ ارقىلى ەرەكشەلەندى. وڭىردە ءداستۇرلى تاسىلدەردەن بىرتىندەپ باس تارتىپ، تسيفرلىق باقىلاۋ جۇيەلەرىنە باسىمدىق بەرىلۋدە.
ەگىس جۇمىستارىنىڭ تابىستى وتۋىنە مەملەكەتتىك قولداۋ شارالارى دا سەرپىن بەردى. «كەڭ دالا – 2» باعدارلاماسى اياسىندا 840 اۋىل شارۋاشىلىعى قۇرىلىمى 122 ميلليارد تەڭگە كولەمىندە جەڭىلدەتىلگەن نەسيە الدى. سونىمەن قاتار شارۋالار جەڭىلدەتىلگەن ليزينگ باعدارلامالارى ارقىلى 34,3 ميلليارد تەڭگە تارتىپ، 610 بىرلىك جاڭا اۋىل شارۋاشىلىعى تەحنيكاسىن ساتىپ الۋعا مۇمكىندىك الدى.
بۇدان بولەك، ازىق-تۇلىك كورپوراتسياسىنىڭ فورۆاردتىق ساتىپ الۋ باعدارلاماسى بويىنشا 55 ءوتىنىم ماقۇلداندى. ال تىكەلەي سۋبسيديالار كولەمىنىڭ 88 پايىزى شارۋاشىلىقتارعا ۋاقىتىلى تولەنىپ، ەگىس ناۋقانى كەزىندە اينالىم قاراجاتىنىڭ تاپشىلىعىن بولدىرماۋعا ىقپال ەتتى.
ءوڭىردىڭ اگرارلىق الەۋەتىن ەكسپورت كولەمى دە ايقىنداي تۇسۋدە. جىل باسىنان بەرى اقمولا وبلىسىنىڭ ەلەۆاتورلارى سىرتقى نارىقتارعا 1,9 ميلليون توننا استىق جونەلتتى.
سوڭعى جىلدارى تسيفرلاندىرۋ اۋىل شارۋاشىلىعىنداعى نەگىزگى ترەندتەردىڭ بىرىنە اينالدى. اسىرەسە تسيفرلىق شەشىمدەردى ەنگىزگەن شارۋاشىلىقتار ءوندىرىستىڭ تيىمدىلىگىن ارتتىرىپ، شىعىنداردى ازايتۋعا قول جەتكىزىپ وتىر. زەرەندى اۋدانىنداعى ءىرى اگروقۇرىلىمداردىڭ ءبىرى بۇل باعىتتا سەگىز جىلدان بەرى جۇمىس ىستەپ كەلەدى.
كاسىپورىن ديرەكتورى دەنيس ءشۆايبوۆيچتىڭ ايتۋىنشا، بۇگىندە وندىرىستىك پروتسەستەردىڭ شامامەن 90 پايىزى تسيفرلىق فورماتقا كوشىرىلگەن.
«بۇگىندە وندىرىستىك پروتسەستەردىڭ شامامەن 90 پايىزى تسيفرلاندىرىلعان. بۇل ەگىس ناۋقانىنان باستاپ ءونىم جيناۋعا دەيىنگى بارلىق كەزەڭدەردەگى جۇمىستىڭ تيىمدىلىگىن ارتتىرۋعا مۇمكىندىك بەرەدى. تسيفرلىق تەحنولوگيالاردىڭ ارقاسىندا ەڭبەك ونىمدىلىگى ءوسىپ، ءار گەكتاردان الىناتىن ءونىم كولەمى ورتا ەسەپپەن 3–4 تسەنتنەرگە ارتادى. سونىمەن قاتار جانار-جاعارمايعا، تۇقىمعا جانە باسقا دا ماتەريالدىق رەسۋرستارعا جۇمسالاتىن شىعىنداردى وڭتايلاندىرۋعا مۇمكىندىك بەرەدى. قازىرگى تاڭدا جاۋىن-شاشىن مولشەرى قولايلى دەڭگەيدە قالىپتاسىپ وتىر، بارلىق دەرلىك داقىلدار بويىنشا كوكتەۋ بايقالادى. سوندىقتان بىلتىرعى دەڭگەيدەن تومەن ەمەس ءونىم الامىز دەپ جوسپارلاپ وتىرمىز»، – دەدى ول.
بيىل وبلىستاعى جالپى ەگىس القابى 5,6 ميلليون گەكتاردى قۇرادى. سونىمەن قاتار اۋىل شارۋاشىلىعىندا نارىق تالابىنا ساي قۇرىلىمدىق وزگەرىستەر بايقالادى. ءداندى جانە ءداندى-بۇرشاقتى داقىلداردىڭ كولەمى 4,5 ميلليون گەكتار دەڭگەيىندە ساقتالسا، مايلى داقىلداردىڭ ەگىس كولەمى 715,2 مىڭ گەكتارعا دەيىن ۇلعايتىلدى.
مال ازىقتىق داقىلدارعا 370,7 مىڭ گەكتار جەر بولىنسە، كوكونىس داقىلدارى 10 مىڭ گەكتاردان استام القاپقا ەگىلدى.
وڭىردە اۋىل شارۋاشىلىعى ونىمدەرىن تەرەڭ وڭدەۋگە دە ەرەكشە نازار اۋدارىلىپ وتىر. وسى ماقساتتا ارشالى اۋدانىندا استىقتى تەرەڭ وڭدەيتىن ءىرى زاۋىت سالۋعا دايىندىق باستالدى. جوبا ىسكە قوسىلعان جاعدايدا وڭىردە جوعارى قوسىلعان قۇنى بار ءونىم ءوندىرىلىپ، جاڭا جۇمىس ورىندارى اشىلادى.
العاشقى كەزەڭدە كاسىپورىندا مىڭ ادام جۇمىسپەن قامتىلسا، جوبا تولىق قۋاتىنا شىققان كەزدە بۇل كورسەتكىش ءۇش مىڭ ادامعا دەيىن جەتەدى دەپ جوسپارلانۋدا.
