Almaty oblysy, Raıymbek aýdany, Qyzylshekara aýylyndaǵy mekteptiń oqýshylary ájetin ótep, dárethanaǵa bara almaı júr. Aýlada ornalasqan dárethananyń kúrkeden esh aıyrmashylyǵy joq. "Adyrna" aparattyq portalyna oqyrmandardan shaǵym-hat kelip tústi. Joldanǵan derekterde Qytaımen shekaralas aýyldaǵy mekteptiń syn kótermes sıpaty sóz bolady.
Vıdeoda Qyzylshekara aýylyndaǵy mektep nysanaǵa alynǵan. Nátıjesinde, mekteptiń joǵarǵy qabatyndaǵy dárethana tek tekseris úshin, "esep berý" úshin ashylatyny áshkerelenedi. Qolyna beınekamera ustaǵan oqyrman úshinshi qabattaǵy dárethanaǵa kóterilgenshe qyzmetker oqýshylar úshin qulpy buzylmaıtyn bólmeni áp-cátte asha qoıady. Avtor kilttiń syldyrlaǵan dybysyn estıdi.
- Bári tap-taza. Eshkim qoldanbaıdy. Balalardy myna jerge kirgizbeıdi. Kim úshin, ne úshin salyndy? Túsiniksiz... Aıǵaq retinde qoqys shelekterin kórseteıin. Bári jarqyrap tur. Jap-jańa. Tekseris kelgende ashý úshin, jalań esep berý úshin jaýyp qoıǵan, - deıdi oqyrman.
Sonymen qatar, beıne-derekte mektep aýlasyndaǵy joǵarǵy synyp oqýshylaryna arnalǵan dárethanalar da kórsetiledi. Olardyń da tozyǵy jetip, qulaýǵa shaq qalǵan.
Jalpy, Qazaqstannyń kóptegen eldi-mekenderinde tazalyq bólmelerin jasaqtaý, jınaqy ustaý jáne salý máselesi oqtyn-oqtyn "tóbe kórsetip" otyrady. Budan buryn "Adyrna" ulttyq portaly Torǵaıdaǵy qymbat baǵaǵa salynǵan arzan dárethana jaıly da jazǵan edi.
2021 jylǵy derekter elimizde 800-den astam mektepte aýla dárethanasynyń syn kótermeı turǵanyn kórsetedi.
"Adyrna" ulttyq portaly
