قىتاي بيلىگى جەر سىلكىنىسىنەن زارداپ شەككەندەرگە كومەك كورسەتۋ جانە بۇلىنگەن ينفراقۇرىلىمدى قالپىنا كەلتىرۋ ءۇشىن 80 ملن يۋان ءبولدى، دەپ حابارلايدى “ادىرنا”.
بۇل شامامەن 5,4 ملرد تەڭگەنى قۇرايدى.
سينحۋا دەرەگىنشە، جەر سىلكىنىسى بەيسەنبى كۇنى ساعات 22:33-تە ناگچۋ قالاسىنىڭ باچەن ۋەزىندە بولعان. ءزىلزالا سالدارىنان 16 ادام قازا تاۋىپ، 76 ادام جاراقات الدى.
قىتايدىڭ قارجى مينيسترلىگى مەن توتەنشە جاعدايلاردى باسقارۋ مينيسترلىگى قۇتقارۋ جۇمىستارىنا جانە زارداپ شەككەن تۇرعىندارعا كومەك كورسەتۋگە 50 ملن يۋان ءبولدى. ال دامۋ جانە رەفورمالار جونىندەگى مەملەكەتتىك كوميتەت بۇلىنگەن ينفراقۇرىلىم مەن قوعامدىق نىسانداردى قالپىنا كەلتىرۋگە ورتالىق بيۋدجەتتەن قوسىمشا 30 ملن يۋان قاراستىردى.
سونداي-اق قىتاي بيلىگى توتەنشە جاعدايعا دەن قويۋ رەجيمىن ءتورتىنشى دەڭگەيدەن ءۇشىنشى دەڭگەيگە دەيىن كوتەرىپ، تابيعي اپاتتارعا بايلانىستى جەدەل ارەكەت ەتۋ تەتىگىن ىسكە قوستى.
قۇتقارۋ جۇمىستارىنا 350 مامان مەن 83 ارنايى تەحنيكا جۇمىلدىرىلدى.
اپاتتان زارداپ شەككەن تۇرعىندارعا گۋمانيتارلىق كومەك تە جەتكىزىلدى. جۇما كۇنى ساعات 04:30-عا دەيىن ايماققا 1 000 ۋاقىتشا باسپانا، 2 821 توسەك، 3 239 شاتىر، 4 280 كورپە جانە باسقا دا كۇندەلىكتى قاجەتتى زاتتار جەتكىزىلگەن.
