الماتى وبلىسى، رايىمبەك اۋداندىق كىتاپحاناسىنىنىڭ جانىنان بەلگىلى عالىم، ديپلومات ءادىل احمەتوۆ اتىنداعى تسيفرلى-ەلەكتروندىق كىتاپحانا اشىلدى، دەپ حابارلايدى “ادىرنا” ءتىلشىسى. بۇل - ءادىل احمەتوۆتىڭ ءوزىنىڭ 80 جىلدىق مەرەيتويىنا وراي اۋدان جاستارىنا، جالپى كىتاپسۇيەر قاۋىمىنا تارتۋى.
ءادىل قۇرمانجانۇلى احمەتوۆ 1941 جىلى الماتى وبلىسى رايىمبەك اۋدانى نارىنقول اۋىلىندا دۇنيەگە كەلگەن.
ءادىل احمەتوۆ قر بعم ءبىلىم بەرۋ قىزمەتىن ليتسەنزيالاۋ جەنىندەگى كوميسسيانىڭ مۇشەسى. قازاقستاننىڭ ەڭبەك سىڭىرگەن قايراتكەرى (2003). «قۇرمەت» وردەنىمەن (2009); «استانا» (1998), «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «استانانىڭ 10 جىلدىعى» (2008) مەدالدارىمەن; «پەداگوگيكالىق قىزمەت سالاسىنا سىڭىرگەن ەڭبەگى ءۇشىن» ى. التىنسارين اتىنداعى ءتوس بەلگىمەن (2007); I دارەجەلى "بارىس" وردەنىمەن، تمد ەلدەرىنىڭ "دوستىق" وردەنىمەن ماراپاتتالعان.
ءادىل احمەتوۆتىڭ 80 جىلدىعىنا وراي سىيعا تارتىلعان تسيفرلى-ەلەكتروندى كىتاپحانا كاسىپكەر قايرات زاۋىتبايۇلىنىڭ باستاماسىمەن جانە دەمەۋشىلىگىمەن جۇزەگە استى.
ادەتتە مەرەيتوي يەلەرى كوشەنىڭ اتىن بەرۋدى، ەسكەرتكىش قويدىرۋدى تالاپ ەتىپ، وزگەلەردەن سىيلىق كۇتسە، ءادىل قۇرمانجانۇلى ءوزىنىڭ 80 جىلدىعىندا تۋعان جەرىنە اسا ۇلكەن سىي جاسادى.
شارا 22-23 شىلدە ارالىعىندا رايىمبەك اۋداندىق كىتاپحاناسىندا ءوتتى. اتاۋلى شاراعا زيالى قاۋىم وكىلدەرى، الماتى وبلىسىنىڭ قالالىق، اۋداندىق كىتاپحانا ديرەكتورلارى، كىتاپحاناشىلار، مادەنيەت قىزمەتكەرلەرى قاتىستى.
تانىمال عالىم، ديپلومات احمەتوۆ ءادىل قۇرمانجانۇلى، پروفەسسور، عالىم، كاسىپكەر، دەمەۋشى قايرات ابەكوۆ زاۋىتبايۇلى، رايىمبەك اۋدانىنىڭ اكىمى قۇدايبەرگەنوۆ نۇرجان كەڭەسۇلى، «ادىرنا» ۇلتتىق پورتالىنىڭ پرەزيدەنتى اۋباكىر ارمان سەرىكۇلى، س.سەيفۋللين اتىنداعى الماتى وبلىستىق امبەباپ كىتاپحاناسىنىڭ ديرەكتورى توقاباەۆا عاليا سلامبايقىزى سىندى بەدەلدى تۇلعالار بوي كورسەتىپ، "ەلەكتروندى كىتاپحانانىڭ" تۇساۋكەسەرىندە ءسوز سويلەپ، ءوز ىقلاستارىن ءبىلدىردى.
سونىمەن قاتار، بارىسىندا عالىم ءا.احمەتوۆتىڭ 80 جاس مەرەيتويىنا وراي ۇيىمداستىرىلعىن «تۇعىرى بيىك تۇلعا» اتتى كىتاپ كورمەسىنە بيبليوگرافيالىق شولۋ جاسالدى.
بۇل شارا «مۇقاعاليتانۋ ءىسىن جانداندىرۋ جانە كىتاپحانالاردى تسيفرلىق-ەلەكتروندى فورماتقا كوشىرۋ» وبلىستىق سەمينار-كەڭەسىنىڭ اياسىندا ۇيىمداستىرىلدى.
رايىمبەك اۋدانىنىڭ اكىمى قۇدايبەرگەنوۆ نۇرجان كەڭەسۇلى ءوز سوزىندە:
"ۋاقىت العا جىلجىپ، زامان جاڭارعان بۇگىنگى تاڭعا دەيىن كىتاپ اتتى ۇلى دۇنيە بۇلاعىنان سۋسىنداپ كەلگەنىمىز بەلگىلى. كىتاپ، عاسىر - عاسىرعا توعىسىپ، ۇرپاق ساباقتاستىعى زامانعا قاراي وزگەرىسكە ۇشىراسا دا ءوزىنىڭ ماڭىزىن جوعالتپايتىنى بەلگىلى.
قازىرگىدەي اقپاراتتىق جۇيە دامىعان كەزەڭدە، ۋاقىت بىزدەن ەندىگى جەردە رۋحاني جاندۇنيەمىزدى ەلەكتروندى كىتاپ ارقىلى بايىتۋدى تالاپ ەتىپ وتىر. مۇنى ءبىز وي-سانا دامۋىنىڭ بيىككە كوتەرىلگەنى دەپ باعالاعانىمىز ءجون. وسى ورايدا، كاسىبىن ەلدىڭ ناسىبىنە اينالدىرىپ كەلە جاتقان قايرات اعامىزعا بۇگىن اۋداندىق كىتاپحانا اياسىندا «ەلەكتروندى كىتاپحانا» اشىپ بەرگەنى ءۇشىن زور العىسىمدى ايتامىن.
اتالعان كىتاپحانانىڭ نەگىزگى ماقساتى –وقىرماننىڭ اقپاراتتىق قاجەتتىلىگىن قاناعاتتاندىرۋ، وقۋ جانە عىلىمي قىزمەتپەن اينالىسۋشىلارعا باعىت-باعدار بەرۋ بولسا، ماقساتتى ءىستىڭ سول دەڭگەيدەن كورىنەتىنىنە نىق سەنىمدەمىن" دەپ جىلى لەبىزىن ءبىلدىردى.
بۇدان وزگە شارا كەزىندە «قازاق پوەزياسىنىڭ ءحانتاڭىرى» اتتى كىتاپ جانە قولونەر كورمەلەرىمەن تانىستىرىلىپ، م.ماقاتاەۆ تۋرالى دەرەكتى فيلم، اۋدان كوركەمونەرپازدارىنىڭ ساحنالىق قويىلىمى قويىلدى.
ايتا كەتۋ كەرەك، رايىمبەك اۋداندىق كىتاپحاناسى 2020 جىلى وبلىس بويىنشا "ۇزدىك كىتاپحانا" نوميناتسياسىن يەمدەنگەن ەدى.
رايىمبەك اۋداندىق كىتاپحاناسى ادىستەمە ءبولىمىنىڭ مەڭگەرۋشىسى رىسبەكوۆا مارجان جۇماتاەۆنا ءىس-شارا تۋرالى:
"تسيفرلى كىتاپحانا قولجەتىمدىلىگى ارقىلى 160 مەملەكەتتىڭ كىتاپحاناسى ەلەكتروندى فورماتتا وقىلادى. بۇل قازاقستان بويىنشا كوپ كىتاپحانالاردىڭ قولى جەتە بەرمەيتىن ۇلكەن مۇمكىندىك. بۇل مۇمكىندىكتىڭ بىزگە بۇيىرعانى - زور مارتەبە. ءبىز ونى قۋانا قابىل الدىق. ەل اعالارىنىڭ ارقاسىندا وسىلاي ايماعىمىزدىڭ جاڭا سەرپىنمەن جاندانۋى، ءبىزدىڭ رەسپۋبليكاعا تانىلۋمىز - ورنى تولماس باقىت" دەپ ءوز ويىمەن ءبولىستى.
"ادىرنا" ۇلتتىق پورتالى
