قىتايدىڭ جاڭا ۇشقىشسىز تىكۇشاعى العاشقى سىناقتى ءساتتى ورىندادى

فوتو: Liu Yang / Xinhua

قىتايدىڭ حاربين قالاسىندا 30 قازان كۇنى Harbin United Aircraft Technology Co.، Ltd. كورپوراتسياسى ازىرلەگەن T1400 اتتى اۋىر سالماقتى ۇشقىشسىز تىكۇشاق ءوزىنىڭ العاشقى سىناقتىق ۇشۋىن ءساتتى ورىندادى، دەپ حابارلايدى “ادىرنا”.

بۇل اۋە اپپاراتىنىڭ ەڭ جوعارى ۇشۋ ماسساسى – 1400 كيلوگرامم، اۋەدە سەگىز ساعاتقا دەيىن ۇشا الادى. ونىڭ جۇمىس بيىكتىگى – 6500 مەتر، ال كولدەنەڭ ۇشۋ جىلدامدىعى – ساعاتىنا 180 كيلومەترگە دەيىن جەتەدى.

T1400 تىكۇشاعىنىڭ قۇرىلىمى ەكى قوزعالتقىشتان تۇرادى جانە جوعارى بەرىكتەگى كومپوزيتتىك ماتەريالدار قولدانىلعان. مۇنداي شەشىم تىكۇشاقتىڭ جۇك كوتەرگىشتىگىن ارتتىرىپ، ىشكى كەڭىستىگىن ۇلعايتقان. ينتەللەكتۋالدى باسقارۋ جۇيەلەرىنىڭ ارقاسىندا بۇل تەحنيكا قۇتقارۋ جانە ىزدەستىرۋ وپەراتسيالارىندا، لوگيستيكالىق تاسىمالداۋدا، سونداي-اق ورمان ءورتىن سوندىرۋدە كەڭىنەن قولدانىلۋى مۇمكىن.

بۇراندالاردىڭ بويلىق ورنالاسۋ سىزباسى تىكۇشاققا جوعارى تۇراقتىلىق، مانەۆرلىلىك جانە جۇك كوتەرگىشتىك بەرەدى. ماشينا 8 بالدىق جەلدە، –40°C-تان +55°C-قا دەيىنگى تەمپەراتۋرادا جۇمىس ىستەي الادى، ءارى تاۋلى ايماقتاردا، شولدە جانە ارالداردا ۇشىپ-قونۋعا بەيىمدەلگەن.

ايتا كەتسەك، T1400 – كوپ ماقساتتى اۋىر پلاتفورما رەتىندە جوبالانعان. ول ناقتى مىندەتكە قاراي كونفيگۋراتسياسىن وزگەرتە الادى. جوبا تەك ازاماتتىق ماقساتتارعا ارنالماعان، ول قوس ماقساتتى (dual-use) پلاتفورما بولىپ سانالادى. بولاشاقتا T1400 اسكەري سالادا دا – لوگيستيكالىق قولداۋ، ەۆاكۋاتسيا، پاترۋل جانە قامتاماسىز ەتۋ وپەراتسيالارىندا پايدالانىلۋى مۇمكىن.