رەسەي پرەزيدەنتى ۆلاديمير پۋتين مامىر ايىندا قازاقستانعا كەلەدى. بۇل تۋرالى قازاقستان پرەزيدەنتى قاسىم-جومارت توقاەۆپەن كەزدەسۋىندە رف ۇكىمەتىنىڭ توراعاسى ميحايل ميشۋستين ايتتى، دەپ حابارلايدى «ادىرنا» ءتىلشىسى.
«سىزگە (قاسىم-جومارت توقاەۆقا – رەد.) ۆلاديمير ۆلاديميروۆيچ ءپۋتيننىڭ ىستىق ىقىلاسىن جەتكىزگىم كەلەدى. بىرەر كۇن بۇرىن پرەزيدەنتپەن ەكىجاقتى قارىم-قاتىناستىڭ كۇن ءتارتىبىن، سونداي-اق بيىل مامىر ايىنا جوسپارلانعان ساپارىنا ازىرلىك جۇمىستارىن ەگجەي-تەگجەيلى تالقىلادىق. ۇكىمەت بۇل ساپاردىڭ دا تابىستى وتۋىنە بارىنشا كۇش سالادى. ءسىزدىڭ بىلتىر قاراشا ايىندا رەسەي فەدەراتسياسىنا جاساعان ساپارىڭىز بارىسىندا مەملەكەتتەر باسشىلارى قويعان بارلىق مىندەتتى ەكى ەل ۇكىمەتتەرى ىسكە اسىرىپ جاتىر»،– دەدى ميحايل ميشۋستين.
سونداي-اق تاراپتار ەكىجاقتى كۇن تارتىبىندەگى وزەكتى ماسەلەلەر جونىندە پىكىر الماستى.
استانادا مامىر ايىنىڭ سوڭىندا ەۋرازيالىق ەكونوميكالىق وداق ەلدەرى كوشباسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەس وتىرىسى جوسپارلانىپ وتىر. رەسەي پرەزيدەنتىنىڭ سول قارساڭداعى ساپارى مەملەكەتتىك مارتەبەگە يە ەكەنى ايتىلادى. قازاقستان بيىلعى قاڭتاردان باستاپ ەاەو-نىڭ كەزەڭدىك توراعالىعىن اتقارىپ كەلەدى.
