الماتىدا ستۋدەنتتەرگە ارنالعان جاتاقحانالار سانىن كوبەيتۋ ماقساتىندا ينۆەستورلاردى جاڭا قۇرىلىس جانە قايتا جاڭعىرتۋ جوبالارىنا قاتىسۋعا شاقىرىپ جاتىر، دەپ حابارلايدى "ادىرنا" ءتىلشىسى.
بۇل جۇمىس مەملەكەتتىك سۋبسيديالاۋ باعدارلاماسى اياسىندا جۇزەگە اسادى. باستامانىڭ نەگىزگى ماقساتى – قالاداعى ستۋدەنتتەردى زاماناۋي، جايلى ءارى قولجەتىمدى تۇرعىن ۇيمەن قامتاماسىز ەتۋ.
باعدارلاما بويىنشا ينۆەستورلار جاڭا جاتاقحانا سالا الادى نەمەسە قولدانىستاعى عيماراتتاردى ستۋدەنتتىك تۇرعىن ۇيگە بەيىمدەي الادى. جوبا بيزنەس وكىلدەرى ءۇشىن دە ءتيىمدى تەتىكتەردى قاراستىرادى. اتاپ ايتقاندا، ستۋدەنتتەردىڭ تۇرۋ اقىسى ەسەبىنەن تۇراقتى تابىس تابۋعا، جاتاقحانا اۋماعىنداعى كوممەرتسيالىق كەڭىستىكتەردى پايدالانۋعا، بانكتىك نەسيە بويىنشا سۋبسيديا الۋعا جانە جەر تەلىمدەرىن راسىمدەۋگە مۇمكىندىك بار.
سونىمەن قاتار ينۆەستورلارعا قۇجاتتاردى راسىمدەۋ كەزىندە تەگىن زاڭگەرلىك كەڭەس بەرىلىپ، تولىق سۇيەمەلدەۋ كورسەتىلەدى.
الماتى قالاسىندا ستۋدەنتتىك جاتاقحانالار سانىن ارتتىرۋ ءۇشىن قۇرىلعان جوبالىق كەڭسە مەملەكەتتىك باعدارلامانىڭ ىسكە اسىرىلۋىن ۇيلەستىرىپ كەلەدى. قازىرگى ۋاقىتتا جوباعا 120-دان استام ينۆەستور قىزىعۋشىلىق تانىتقان. بۇل ستۋدەنتتىك ينفراقۇرىلىمدى دامىتۋعا بيزنەس قاۋىمداستىق تاراپىنان سۇرانىس جوعارى ەكەنىن كورسەتەدى.
