بۇرىنعى يندۋستريا جانە ينفراقۇرىلىمدىق دامۋ ۆيتسە-ءمينيسترى تيمۋر توقتاباەۆ قاماۋعا الىندى. بۇل تۋرالى انتيكوردىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
سىبايلاس جەمقورلىققا قارسى قىزمەت باس پروكۋراتۋرامەن بىرلەسىپ پايدالى قازبالار كەن ورىندارىن بەرۋدىڭ زاڭدىلىعىن تەكسەرۋ ناتيجەلەرى بويىنشا يندۋستريا جانە ينفراقۇرىلىمدىق دامۋ مينيسترلىگىنىڭ لاۋازىمدى تۇلعالارىنا قاتىستى سوتقا دەيىنگى تەرگەپ-تەكسەرۋدى باستادى.
ۆەدومستۆو وكىلدەرىنىڭ مالىمەتىنشە، مينيسترلىكتىڭ لاۋازىمدى ادامدارى جەكەلەگەن كاسىپكەرلىك سۋبەكتىلەرىنىڭ مۇددەسىندە ارەكەت ەتە وتىرىپ، بارلاۋ سىلتاۋىمەن اۋكتسيون وتكىزبەستەن پايدالى قاتتى قازبالار قورى بەلگىلەنگەن كەن ورىندارىن زاڭسىز بەرگەنى انىقتالعان. بۇرىن جۇرگىزىلگەن بارلاۋ فاكتىسى قۇجاتتاردى بۇرمالاۋ ارقىلى ادەيى جاسىرىلعان.
ناتيجەسىندە، لاۋازىمدى تۇلعالارمەن ۇلەستەس كاسىپكەرلەر قول قويۋ بونۋسىنىڭ ەڭ تومەنگى قۇنى ءۇشىن وندىرۋگە دايىن كەن ورىندارىن الدى. كەن ورىندارىن ساتۋ بويىنشا اۋكتسيوندار وتكىزىلمەگەندىكتەن، مەملەكەت ونداعان ميلليارد تەڭگە الماعان.
“7 قاراشادا لاۋازىمدىق وكىلەتتىكتەرىن اسىرا پايدالاندى دەگەن كۇدىك بويىنشا بۇرىنعى يندۋستريا جانە ينفراقۇرىلىمدىق دامۋ ۆيتسە-ءمينيسترى ت.توقتاباەۆ ۇستالدى. تەرگەۋ سوتتىڭ سانكتسياسىمەن ت.توقتاباەۆتىڭ جانە ونىڭ جاقىن تۋىستارىنىڭ (ەليتالىق جەكە ۇيلەر، جەر ۋچاسكەلەرى، Cadillac Escalade ماركالى اۆتوكولىكتەرى، Mercedes-Benz Maybach S580 4 Matic, ەكى BMW X5 Xdrive40I, Bentley Bentayga V8) قىمبات جىلجىمالى جانە جىلجىمايتىن مۇلكى انىقتالدى جانە قاماۋعا الىندى”، – دەلىنگەن حابارلامادا.
اتالعان دەرەك بويىنشا تەرگەۋ جالعاسىپ جاتىر. تەرگەۋ مۇددەسى ءۇشىن وزگە اقپارات جاريا ەتىلمەيدى.
