بۇرىنعى ادىلەت ءمينيسترى مارات بەكەتاەۆ 9 جىلعا سوتتالدى. بۇل تۋرالى بۇگىن انتيكوردىڭ رەسمي وكىلى دانيار بەگايداروۆ ايتتى، دەپ حابارلايدى «ادىرنا» ءتىلشىسى.
ول قىلمىستىق ءىستىڭ الاياقتىق، اسا ءىرى كولەمدەگى ۇرلىق، كاسىپكەرلىك قىزمەتكە زاڭسىز قاتىسۋ فاكتىلەرى بويىنشا تەرگەلگەنىن مالىمدەدى.
رەسمي وكىل ەكس-ءمينيستردىڭ ءىسى «قۇپيا» بەلگىسىمەن تەرگەلگەندىكتەن، قىلمىستىق وقيعانىڭ ءمان-جايى جاريا ەتىلمەيتىنىن اتاپ ءوتتى.
ەسكە سالايىق، بەكەتاەۆ 2023 جىلدىڭ قازان ايىندا قاماۋعا الىنعان بولاتىن. وعان «ۇلەسكەر كومپانيانىڭ مۇددەسىن قولداپ، مەملەكەتكە ۇلكەن كولەمدە شىعىن كەلتىردى» دەگەن ايىپ تاعىلعان. سونداي-اق «مەملەكەت باسشىسىنىڭ زاڭسىز شىعارىلعان اكتيۆتەردى ىزدەۋ جانە قايتارۋ جونىندەگى تاپسىرماسىن ورىنداۋ شەڭبەرىندە لاۋازىمدىق وكىلەتتىكتەرىن اسىرا پايدالاندى» دەگەن كۇدىككە ىلىنگەن بولاتىن.
بەكەتاەۆ 2016-2022 جىلدارى ادىلەت ءمينيسترى بولعان. ول قاڭتار وقيعاسىنان سوڭ قىزمەتىنەن بوساتىلعان، كەيىن پرەمەر-ءمينيستردىڭ كەڭەسشىسى قىزمەتىنە تاعايىندالعان ەدى. بىراق ول كەڭەسشى قىزمەتىنەن ءبىر جىلدان كەيىن كەتكەن.
