سايلاۋ – دەموكراتيالىق وزگەرىستەرگە سەبەپكەر بولادى. ساياساتتانۋشى، قوعام بەلسەندىسى، تاريح عىلىمدارىنىڭ كانديداتى سايلاۋبەك ءادىل وسىنداي پىكىردە. بۇل تۋرالى ول “ادىرنا” ۇلتتىق پورتالىنىڭ تىلشىسىنە ايتىپ بەردى.
“پرەزيدەنت سايلاۋى جاڭاشىلدىقتىڭ باستاۋى. قازىرگى الەمدە بولىپ جاتىرعان وزگەرىستەردى شەشۋگە تۇراقتىلىق، ناقتىلىق جانە پرەزيدەنتتىڭ وسى الەم ەلدەر قاتارىندا وزىندىك جۇمىسى مەن مىندەتىن جەتى جىل بويى اتقارىپ، رەفورمالاردى ىسكە اسىرۋ مۇمكىندىگى قاجەت. وسى مۇمكىندىكتى جىبەرمەۋ كەرەك. سونىمەن قاتار، حالىقپەن تىعىز قاتىناس ورناتۋ باستى مىندەتكە كىرۋ قاجەت. ادىلدىككە جانە شىنشىلدىققا، جاناشىلدىققا دەگەن ءۇمىت اربىرىمىزدە بار. ەڭ باستىسى وسى بىرلىك پەن تۇراقتىلىق بار جەردە قوعام دا وزگەرەرى انىق.
قازىر قوعام وزگەرىپ جاتىر، الەۋمەت وزگەرىپ جاتىر،حالىقتىڭ وي-ساناسى وزگەرىپ جاتىر. جاڭا زامانۋي باعىتتا وزگەرىپ جاتقاننان كەيىن، سايلاۋ قازىرگى تاڭداعى قاجەتتى دۇنيەلەردىڭ ءبىرى ما دەپ ويلايمىن. ەندى ول قالاي وڭ ناتيجە بەرەتىنى، نە قانداي دا ءبىر ناتيجە بەرمەيتىنىن ۋاقىت كورسەتەر. دەگەنمەن، قازىرگى كەزەڭدەگى ساياسي جۇيەنى ءبىر سىلكىپ، ناقتى قادامدارعا جول سىلتەيتىنىنە ءۇمىتتىمىز”،- دەدى تاريحشى.
ساياساتتانۋشىنىڭ ايتۋىنشا، سايلاۋ – ساياسي جۇيەنى كەزەڭ-كەزەڭىمەن قايتا جاڭارتۋدىڭ باستاۋى
“سايلاۋدى دەموكراتيالىق وزگەرىستەرگە سەبەپكەر بولا الاتىنىن ايتقىم كەلەدى. ەگەر ءادىل سايلاۋ بولسا جانە بۇل باعىتتى ۇستانۋعا ءاربىر سانالى ازامات ءوزىنىڭ تاڭداۋىن جاساسا، ارتىقبايبالام سالۋعا ۋاقىت جوق. ءبىزدىڭ ارى قاراي دامۋىمىزعا، كەزەڭ-كەزەڭمەن جۇرۋگە، باستالعان رەفورمالاردىڭ اياقتالۋىنا تەك قانا پرەزيدەنت ەمەس، بۇكىل حالىق بولىپ جۇمىس جاساعانىمىز دۇرىس. مىنە، سونىن ءوزى دەموكراتيالىقتىڭ نەگىزگى كوزدەرىنىڭ ءبىرى. ءبىر تۇتاستىقپەن، بىرلىكتە جۇمىس جاساۋ، بۇل قانداي دا ءبىر ساياسي ناۋقان بولسىن تەك وڭ ناتيجە بەرەدى”،- دەپ ءسوزىن قورىتىندىلادى.
”ادىرنا” ۇلتتىق پورتالى
