ەرلان قارين پرەزيدەنت سايلاۋى جايىنداعى ويىمەن ءبولىستى. ول مۇنى نارتاي ارالبايۇلىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
– مەملەكەت باسشىسى ءوزىنىڭ ناۋرىز ايىنداعى جولداۋىندا جاڭا ساياسي رەفورمالاردىڭ پاكەتىن ۇسىندى. ول بويىنشا كونستيتۋتسياعا وزگەرتۋلەر مەن تۇزەتۋلەر ازىرلەندى. بۇل وزگەرىستەر اتا زاڭداعى 9 تاراۋدىڭ 8-ءىن قامتىپ، 33 باپقا، ياعني، نەگىزگى زاڭنىڭ ۇشتەن ءبىر بولىگىنە وزگەرىس ەندى. سونىڭ ارقاسىندا جاڭا مەملەكەتتىك باسقارۋ مودەلى قالىپتاستى. مىسالى، ءماجىلىستىڭ قۇزىرەتى كەڭەيەدى. ارالاس سايلاۋ جۇيەسى ەنگىزىلەدى. كونستيتۋتسيالىق سوت سەكىلدى مۇلەم جاڭا قۇرىلىم قۇرىلادى. ال جاڭا مودەلدى جۇزەگە اسىرۋ ءۇشىن بيلىكتىڭ بارلىق تارماقتارىن جاڭارتۋ قاجەت. جاڭارتۋدىڭ جولى – سايلاۋ. سوندىقتان پرەزيدەنت قىركۇيەكتەگى جولداۋىندا الداعى سايلاۋ جوسپارىن جاريا ەتتى. الدىمەن پرەزيدەنت سايلاۋىن وتكىزەمىز. ودان سوڭ پارلامەنت پەن بارلىق دەڭگەيدەگى ءماسليحاتتاردى قايتا سايلايمىز. سودان كەيىن جاڭا ۇكىمەت جاساقتالادى. ال ۇكىمەتكە پارلامەنتتە باسىم كوپشىلىككە يە بولعان پارتيانىڭ عانا ەمەس، وزگە دە ساياسي ۇيىمداردىڭ وكىلدەرى مۇشە بولادى. سوندىقتان الداعى پرەزيدەنتتىك سايلاۋ بۇل كونستيتۋتسيالىق رەفورمالاردان تۋىنداعان شەشىم، – دەدى قارين.
