92 جاستاعى كامەرۋن پرەزيدەنتى پول بييا الداعى پرەزيدەنت سايلاۋىنا كانديدات رەتىندە ۇسىنىلدى، دەپ حابارلايدى «ادىرنا» ءتىلشىسى.
«2025 جىلعى 12 قازاندا وتەتىن پرەزيدەنتتىك سايلاۋعا ءوز كانديداتۋرامدى ۇسىنامىن. ءبىز بىرگە كەز كەلگەن قيىندىقتى ەڭسەرەمىز»،–دەدى ول X الەۋمەتتىك جەلىسىندەگى پاراقشاسىندا.
ايتا كەتەيىك، پول بييا – كامەرۋننىڭ ەكىنشى پرەزيدەنتى. 1982 جىلدان بەرى ەلدى باسقارىپ كەلەدى. سوڭعى رەت ول 2018 جىلعى سايلاۋدا جەڭىسكە جەتىپ، 71,28% داۋىس جيناعان بولاتىن. سول كەزدە وپپوزيتسيا جاپپاي زاڭبۇزۋشىلىقتاردىڭ تىركەلگەنىن مالىمدەگەن. بۇل جاعدايعا قاراماستان، 2024 جىلدان باستاپ بيلەۋشى CPDM پارتياسىنىڭ مۇشەلەرى بييانى تاعى دا سايلاۋعا تۇسۋگە شاقىرعان. الايدا وپپوزيتسيا مەن ازاماتتىق قوعام وكىلدەرىنىڭ ءبىر بولىگى ونىڭ ۇزاققا سوزىلعان بيلىگى ەل دامۋىن تەجەپ وتىر دەپ ەسەپتەيدى.
Reuters اگەنتتىگىنىڭ حابارلاۋىنشا، ەگەر بييا قايتا سايلانسا، ونىڭ پرەزيدەنتتىك وكىلەتتىگى ءجۇز جاسقا دەيىن جالعاسۋى مۇمكىن.
