قىزىلوردا قالاسىنداعى «انا مەن بالا» ورتالىعىنا بوسانۋعا ءوز اياعىمەن بارعان جازيرا قوجانوۆا ىشتەگى سابيىمەن بىرگە باقيلىق بولدى، دەپ جازادى "ادىرنا" ۇلتتىق پورتالى 31 تەلەكانالعا سىلتەمە جاساپ.
قايتىس بولار الدىندا تولعاق ۇستىندە جاتقان ايەلدىڭ اۋزىنان كوبىك اعىپ، قاتتى قينالدى دەيدى مارقۇمنىڭ قاسىندا بولعان ءسىڭلىسى. ايتۋىنشا، مۇنى كورە تۇرا دارىگەرلەر ءتيىستى ەم جۇرگىزبەي، جۇمىستارىنا سالعىرت قاراعان. سونىڭ كەسىرىنەن ءتورت بالانىڭ اناسىنان ايىرىلدىق دەگەن مارقۇمنىڭ جاقىندارى ورتالىق الدىنا جينالدى.
ءتورت بالانىڭ اناسى وتكەن اپتانىڭ سوڭىندا ءوز اياعىمەن انا مەن بالا ورتالىعىنا بارعاندا بۇكىل اۋلەت شەكەسى تورسىقتاي ۇل دۇنيەگە كەلەدى دەپ ۇمىتتەنگەن. بىراق بۇگىن جەتكەن قارالى حابارعا مارقۇمنىڭ جاقىندارى ءالى دە سەنە الار ەمەس. مارقۇمنىڭ تۋىستارى تولعاق ۇستىندە كوز جۇمعان ايەلدىڭ ولىمىنە دارىگەرلەردى كىنالايدى. ال ءتۇنى بويى جازيرانىڭ قاسىندا بولعان ءسىڭىلىسى ونىڭ تولعاق كەزىندە قاتتى قينالعانىن ايتادى. جۇرەگى قىسىلا باستاعاندا اق حالاتتىلارعا كەسىر تىلىگى ارقىلى بوساندىرىڭىزدار دەپ جالىندىق تا دەيدى. ايتۋلارىنشا، سوندا دا دارىگەرلەر ءتيىستى ەم جاساۋعا اسىقپاعان.
– اپكەمنىڭ كوزى الارىپ كەتىپ بارا جاتىر ەكەن. اۋزىنان كوبىك اعىپ... اكۋشەرگە ءبىز نەشە رەت باردىق. تولعاتىپ جاتقان كەزدە قولىن ۇستايدى عوي. بۇل ادامدى يتەرىپ جىبەردى عوي. ادام قۇرلى كورگەن جوق. سول ساتتە جۇكتى كەلىنشەكتىڭ قاسىندا بولعان جاۋاپتى دارىگەر مارقۇم جازيرانىڭ دەنساۋلىعىندا ەشقانداي كىنارات بولمادى دەيدى. ءتىپتى بوسانۋعا تولىق دايىن بولعانىن ايتادى. بىراق ايەلدىڭ كوز جۇمۋ سەبەبىن ءوزى دە بىلمەي وتىر،- دەيدى مارقۇمنىڭ ءسىڭلىسى سالتانات قوجانوۆا.
– ءتيىستى ەمىن جاسادىڭىزدار ما؟ – جاسالدى ءبارى. – بىراق امان الىپ قالا المادىڭىزدار. – قولىمىزدان كەلمەدى. – ءوز مىندەتىڭىزدى تولىق ورىندادىڭىز با؟ – جوق، ولاي ايتا المايمىن", دەيدى «انا مەن بالا» ورتالىعىنىڭ دارىگەرى جانار نۇرىمبەتوۆا.
وسىلايشا، جازيرانى بوساندىرماق بولعان دارىگەر ماردىمدى جاۋاپ بەرمەدى. ءسابي مەن انا ولىمىنە قاتىستا دەنساۋلىق ساقتاۋ باسقارماسىنداعىلار دا ازىرگە جاق اشپاي وتىر. ال 39 جاسىندا مارقۇم بولعان جازيرا قوجانوۆانىڭ ۇيىندە جولداسى مەن ءتورت بالاسى كۇتكەن ەدى... قاپىدا قايعى جامىلعان جانۇيا جاۋاپتىلاردىڭ بارلىعى زاڭمەن جازاسىن السىن دەپ وتىر.
"ادىرنا" ۇلتتىق پورتالى
