نەمولچي قورىنىڭ باسشىسى، قوعام بەلسەندىسى دينا ءتاڭسارى پاۆلوداردا 16 جاستاعى جەتىم قىزدى ءۇش جىگىت اياۋسىز زورلاعانىن حابارلادى، دەپ جازادى "ادىرنا" ۇلتتىق پورتالى.
ونىڭ ايتۋىنشا، 16 جاستاعى قىز زورلىق-زومبىلىققا شىداماي، 10-قاباتتان سەكىرىپ كەتكەن.
"قىزدى الداۋ جولىمەن پاتەرگە كىرگىزىپ، زورلاعان. ول مۇنى كوتەرە الماي تەرەزەدەن سەكىرىپ كەتتى. ەڭ قورقىنىشتىسى، بۇل قىز - تۇل جەتىم، پاۆلودارداعى بالالار ءۇيىنىڭ تاربيەلەنۋشىسى. بىزگە ونىڭ ۇلكەن اپكەسى حابارلاسىپ، كامەلەتكە تولعان جالعىز جاقىنى ەكەنىن ايتتى. قازىر شۇعىل تۇردە زارداپ شەككەن قىزعا ونى قامقورشى رەتىندە راسىمدەۋىمىز قاجەت",- دەپ جازدى ول ءوزىنىڭ فەيسبۋك پاراقشاسىندا.
ەكىباستۇزدان كەلگەن اپالى-سىڭلىلەر 2009 جىلدان بەرى ەكى بولەك جەتىمدەر ۇيىندە تاربيەلەنگەن.
"انالارى 2010 جىلى اتا-انا قۇقىعىنان ايىرىلعان. 2012 جىلى كوز جۇمىپ، قىزدار تۇل جەتىم قالعان. وسىلايشا اپالى-سىڭلىلەر پاتروناتتىق وتباسىعا ءتۇسىپ، قامقورشىدان تالاي تاياق جەگەن. ۇلكەن اپكەسى 2021 جىلى تۇرمىسقا شىققان. ال كىشى ءسىڭلىسى قاشىپ كەتكەن. كوللەدجگە تۇسكەننەن كەيىن جاسوسپىرىمدەر ۇيىنە ورنالاستىرعان", - دەيدى قوعام بەلسەندىسى.
تۋعان كۇنگە بارعان قىز ءۇش جىگىت تاراپىنان زورلىق-زومبىلىققا تاپ بولادى...
"ول تانىسىنىڭ تۋعان كۇنىنە بارىپ، الايدا ول جەردە ءوزىن ىڭعايسىز سەزىنىپ، اقىرى كەتىپ قالادى. اپكەمنىڭ ۇيىنە بارىپ، سول جەردە قالامىن دەپ ويلايدى. بىراق، پاۆلودار قالاسىن بىلمەي اداسىپ، ورتا جولدا ءۇش جىگىتتى كەزدەستىرەدى. ونىڭ بىرەۋى اپكەسىنىڭ سىنىپتاسى بولىپ شىعادى. ول ونى ولارمەن بىرگە بارۋعا كوندىرىپ، تاكسي شاقىرىپ، اپكەنە جىبەرەمىن دەپ ۋادە بەرەدى. الايدا، ارى قاراي قورقىنىشتى ءتۇس ورىن الىپ، اپكەسى ءسىڭلىسىن ىزدەي باستايدى. بىراق، سول ساتتە ونىڭ تەلەفونى ءوشىرۋلى بولادى",- دەيدى دينا ءتاڭسارى.
وسىلايشا، ءۇش جىگىت 16 جاستاعى قىزدى پاتەرگە الداپ كىرىپ، اياۋسىز زورلاعان. ازعىنداردىڭ ارسىز ارەكەتىنە شىداي الماعان ستۋدەنت 10-قاباتتان سەكىرىپ كەتكەن. ءتىرى قالىپ، ۇزاق ۋاقىت جانساقتاۋ بولىمىندە جاتقان.
"ومىرتقاسى سىنىپ، ىشكى اعزالارىنا زاقىم كەلگەن. ىشكى قۇرىلىسىنىڭ قابىنۋى مي جۇمىسىنا كەرى اسەر ەتۋدە. قازىر ونىڭ كورۋ قابىلەتى ناشارلاپ، ەستە ساقتاۋ قابىلەتى بۇزىلدى. ءتورت رەت وتا جاسالدى. الدا تاعى جاسالادى", - دەيدى قوعام بەلسەندىسى.
پاۆلودار وبلىسى پوليتسيا دەپارتامەنتىنىڭ مالىمەتىنشە، 16 جاستاعى قىزدى زورلاۋ دەرەگىنە قاتىستى كۇدىكتىلەر ۇستالدى.
"قازىر قىلمىستىق كودەكستىڭ 120-بابى 3-1 بولىگى (زورلاۋ), 105-ءبابى(وزىن-وزىنە قول سالۋعا دەيىن جەتكىزۋ) جانە 121-بابىنىڭ 3-1 بولىگى (سەكسۋالدى سيپاتتاعى زورلىق-زومبىلىق ارەكەتتەرى) بويىنشا تەرگەۋ ءجۇرىپ جاتىر. ساراپتامالار تاعايىندالدى. تەرگەۋ ەرەكشە باقىلاۋعا الىندى", – دەلىنگەن حابارلامادا.
"ادىرنا" ۇلتتىق پورتالى
