2026 جىلعى 5 اقپاندا رۋدنىي قالاسىندا 900 ورىنعا ارنالعان مەملەكەتتىك تىلدە وقىتاتىن №8 جالپى ءبىلىم بەرەتىن جاڭا مەكتەپ اشىلدى. وسى ايتۋلى كۇندى وقۋشىلار جانە ولاردىڭ اتا-انالارى اسىعا كۇتكەن بولاتىن.
وبلىس اكىمىنىڭ ورىنباسارى باقىتجان نارىمبەتوۆ قۇتتىقتاۋ سوزىندە: «وسى مەكتەپتىڭ اشىلۋى ەل تاۋەلسىزدىگىنىڭ 35 جىلدىعىمەن، سونداي-اق قازاق حالقىنىڭ ۇلى اعارتۋشىسى، ءبىزدىڭ جەرلەسىمىز ىبىراي ءالتىنساريننىڭ 185 جىلدىعىمەن تۇسپا-تۇس كەلىپ وتىر. مەملەكەت باسشىسىنىڭ باستاماسىمەن ىسكە اسىرىلعان "كەلەشەك مەكتەپتەرى" ۇلتتىق پيلوتتىق جوباسى شەڭبەرىندە ءوڭىر قالالارى مەن اۋداندارىندا 4500 ورىندىق 6 مەكتەپ اشىلدى. ءبىزدىڭ ءوڭىرىمىز مەملەكەت باسشىسىنىڭ تاپسىرماسىن ورىندادى. ەندىگى ماقسات – وسى مەكتەپتىڭ الەۋەتىن ءتيىمدى پايدالانىپ، بالالارعا ساپالى ءبىلىم بەرۋ جانە ەل دامۋىنا ۇلەس قوساتىن ازامات ەتىپ تاربيەلەۋ. جاڭا مەكتەپ قۇتتى بولسىن! بارشاڭىزعا ساتتىلىك، مەكتەپ ۇجىمىنا جەمىستى ەڭبەك پەن تولاعاي تابىستار تىلەيمىن!»، – دەدى.
رۋدنىي قالاسىنىڭ قۇرمەتتى ازاماتى، پەداگوگيكالىق ەڭبەك ارداگەرى عابدوللا احمەتجانوۆ مەكتەپتىڭ اشىلۋىنا جينالعان قاۋىمدى قۇتتىقتاپ، ءوز باتاسىن بەردى.
ءبىرىنشى سىنىپ وقۋشىسىنىڭ اجەسى راشيلا كالەنوۆا جاڭا مەكتەپ ءوز وقۋشىلارىنىڭ ەكىنشى ءۇيى بولاتىنىنا سەنىمدى. «مەكتەپتە بالالارىمىزدىڭ جان-جاقتى دامۋىنا ۇلكەن مۇمكىندىكتەر جاسالعان. مۇندا ءبىلىم العان وقۋشىلار قازاقستاننىڭ پاتريوتتارى، بەلسەندى جانە سانالى ازاماتتارى بولىپ وسەدى دەگەن سەنىمدەمىن»، - دەدى.
جاڭا مەكتەپتە وقۋشىلاردىڭ قابىلەتتەرىن اشۋعا بارلىق جاعدايلار جاسالعان. كىشى، ورتا جانە جوعارى بۋىن ءۇشىن جەكە بلوكتار قاراستىرىلعان. حيميا، بيولوگيا، فيزيكا، ينفورماتيكا، روبوتوتەحنيكا پاندىك كابينەتتەرى، سونداي-اق STEAM-زەرتحانا وقۋشىلاردىڭ زەرتتەۋ مادەنيەتىن دامىتۋعا مۇمكىندىك بەرەدى.
وقۋ كابينەتتەرى كومپيۋتەرلىك جابدىقتارمەن، ينتەراكتيۆتى تاقتالارمەن، شەت تىلدەر كابينەتتەرى - لينگافوندارمەن جاراقتالعان. مەكتەپتە قاجەتتى قۇرالدارىمەن 3 سپورت زالى، حورەوگرافيا زالى، جايلى اسحانا بار. ەڭبەككە باۋلۋ شەبەرحانالارىندا ستانوكتار جانە تىگىن جابدىقتارى قويىلعان.
اۋلادا وقۋشىلاردى جان-جاقتى دامىتۋ ءۇشىن قوزعالىس ويىندارعا جانە دەمالۋعا ارنالعان الاڭدار ورناتىلعان.
مەكتەپ ديرەكتورى قىمبات ءبىرمانوۆا مەكتەپ ەرەكشە ءبىلىم بەرۋ قاجەتتىلىگى بار بالالارعا بەيىمدەلگەنىن اتاپ ءوتتى: مۇمكىندىگى شەكتەۋلى ازاماتتار ءۇشىن ليفت، پاندۋستار جۇمىس ىستەيدى، ارنايى سانيتارلىق بولمەلەر جابدىقتالعان، ينكليۋزيانى قولداۋ كابينەتى قىزمەتىن باستادى.
6 سىنىپ وقۋشىسى اجار رۇستەموۆا ءوز قۋانىشىمەن ءبولىستى: «مەكتەپتىڭ كىتاپحاناسى وتە ۇلكەن ەكەن! كىتاپ قورى بىزگە وقۋدا قاجەت جانە قوسىمشا ەلىمىزدىڭ تاريحي، مادەني مۇراسىمەن تانىسۋعا مۇمكىندىك بەرەدى. ىڭعايلى جانە جايلى كوۆوركينگ ايماقتار مەن ونەر ستۋدياسىن كورىپ تاڭقالىپ وتىرمىن، وسى جەردە بولاشاقتا ىسكە اسىراتىن شىعارماشىلىق جوسپارلارىمىز وتە كوپ!»
مەكتەپ قوستاناي وبلىسى بويىنشا قازاقستاندىق ۇلتتىق يۋنەسكو كلۋبتارى فەدەراتسياسىنىڭ وڭىرلىك ۇيلەستىرۋشىسى قىزمەتىن اتقارىپ، وسى سالادا حالىقارالىق تاجىريبە الماسۋ بويىنشا بەلسەندى جۇمىس جۇرگىزۋدى جوسپارلاپ وتىر.
كەنشىلەر قالاسى ءۇشىن مەكتەپتە 62 جاڭا جۇمىس ورنىنىڭ اشىلۋى ماڭىزدى. ونىڭ 34-ءى پەداگوگتەر، ولارعا ساپالى ءبىلىم بەرۋ جانە وقۋشىلاردىڭ زياتكەرلىك، سپورتتىق جانە شىعارماشىلىق قابىلەتتەرىن دامىتۋ ءۇشىن جاسالعان قولايلى جاعدايلاردى تولىعىمەن پايدالانۋ مىندەتى قويىلىپ وتىر.
ەستەرىڭىزگە سالا كەتەيىك، ۇلتتىق جوبا اياسىندا 4500 ورىندىق 6 مەكتەپ اشىلدى: ارقالىق قالاسىندا (300 ورىن), قوستاناي اۋدانىنىڭ زارەچنىي اۋىلىندا (900 ورىن), ەكى مەكتەپ قوستاناي قالاسىندا (1200 جانە 900 ورىن), اۋليەكول اۋدانىنىڭ قۇسمۇرىن اۋىلىندا (300 ورىن) جانە رۋدنىي قالاسىندا (900 ورىن)
