سامارقاندا ءىى دۇنيەجۇزىلىك تۇركولوگيا قۇرىلتايى ءوتىپ جاتىر

208
Adyrna.kz Telegram
https://adyrna.kz/storage/uploads/Jj19DyeP1CVLcLcUcnBS1ySVwpEV4sw05zaqext7.jpg

20 قاراشادا وزبەكستاننىڭ سامارقان قالاسىندا ءىى دۇنيەجۇزىلىك تۇركولوگيا قۇرىلتايى باستالدى، دەپ حابارلايدى "ادىرنا".

1926 جىلى باكۋدە وتكەن العاشقى تۇركولوگيا قۇرىلتايىنىڭ 100 جىلدىعىنا ارنالعان حالىقارالىق جيىن وزبەكستان پرەزيدەنتىنىڭ باستاماسىمەن تۇركى مەملەكەتتەرى ۇيىمى مەن وزبەكستاننىڭ ءبىلىم جانە عىلىم مينيسترلىگى بىرلەسىپ ۇيىمداستىردى.

ءىس-شاراعا حالىقارالىق ۇيىمداردىڭ باسشىلارى، جوعارى وقۋ ورىندارى مەن عىلىمي-زەرتتەۋ مەكەمەلەرىنىڭ جەتەكشىلەرى، بەلگىلى تۇركولوگتار مەن عالىمدار قاتىستى.

قۇرىلتاي جۇمىسىنا قاتىسقان قر پارلامەنتى سەناتىنىڭ ەكس-دەپۋتاتى دارحان قىدىرالى «قۇتلىق قاعانى كەشەنى» تاقىرىبىندا بايانداما جاسادى. بۇل تۋرالى ول Facebook-تەگى پاراقشاسىندا جازدى.

عالىمنىڭ ايتۋىنشا، 1926 جىلعى باكۋ قۇرىلتايىندا كۇلتەگىن، بىلگە قاعان جانە تونىكوك جازبالارى كەڭىنەن تالقىلانىپ، كونە تۇركى جازبا ەسكەرتكىشتەرىن زەرتتەۋ، قورعاۋ جانە عىلىمي اينالىمعا ەنگىزۋ ماسەلەلەرى كوتەرىلگەن.

دارحان قىدىرالى باكۋ قۇرىلتايىنان كەيىن ءبىر عاسىرعا جۋىق ۋاقىت وتكەندە ەلتەرىس قۇتلىق قاعان كەشەنىنىڭ تۇركى حالىقتارى وكىلدەرىنىڭ قاتىسۋىمەن جۇرگىزىلگەن دالالىق زەرتتەۋلەر ناتيجەسىندە تابىلۋىن تاريحي ساباقتاستىقتىڭ كورىنىسى رەتىندە باعالادى.

ونىڭ سوزىنشە، قۇتلىق قاعان كەشەنىنەن تابىلعان جازبا ەسكەرتكىشتە تۇتاس تۇركى الەمىنە اتاۋ بولعان «تۇرۇك» ءسوزى العاش رەت تاسقا قاشالعان. بۇل جاڭالىق ورحون جازبا ەسكەرتكىشتەرىنىڭ تاريحىن VIII عاسىردان VII عاسىرعا دەيىن تەرەڭدەتە تۇسەدى.

سونداي-اق دارحان قىدىرالى 2027 جىلى ءبىرىنشى تۇرىك قاعاناتىنىڭ قۇرىلعانىنا 1475 جىل تولاتىنىن اتاپ ءوتتى. ول بۇل داتانىڭ تۇركى حالىقتارىنىڭ ورتاق تاريحىن زەردەلەۋ جانە مەملەكەتتىلىك باستاۋلارىن تەرەڭىرەك تانۋ تۇرعىسىنان ماڭىزدى ەكەنىن جەتكىزدى.

ەكس-سەناتور ءوز جازباسىندا سامارقانداعى حالىقارالىق جيىندى ۇيىمداستىرۋشىلارعا العىس ءبىلدىرىپ، وزبەك حالقىنا قوناقجايلىعى ءۇشىن ريزاشىلىعىن جەتكىزدى.

پىكىرلەر