ميكروفونىن قايتارۋعا تىرىسقان وپەراتورعا – ايىپپۇل. تسەح جابىلدى

270
Adyrna.kz Telegram
https://adyrna.kz/storage/uploads/LwyISqblj5d1G3DnX2zIq5yqDbWWXdCI3nT0VzYQ.webp

فوتو: 7 ارنا

استانادا تۇرعىنداردىڭ شاعىمى مەن جۋرناليستىك زەرتتەۋدەن كەيىن سامسا وندىرەتىن تسەحقا سانيتاريالىق-ەپيدەميولوگيالىق باقىلاۋ جۇرگىزىلدى، دەپ حابارلايدى “ادىرنا”. 

تەكسەرۋ بارىسىندا بىرقاتار سانيتاريالىق تالاپتىڭ ساقتالماعانى انىقتالدى. بۇل تۋرالى قالالىق سانيتاريالىق-ەپيدەميولوگيالىق باقىلاۋ دەپارتامەنتى ايتتى.

تەكسەرۋشىلەر كاسىپورىننىڭ قىزمەتىن باستاعانى تۋرالى مىندەتتى حابارلاما جولداماي جۇمىس ىستەگەنىن دە انىقتاعان. سونىمەن قاتار قىزمەتكەرلەردىڭ مىندەتتى مەديتسينالىق تەكسەرۋدەن وتپەگەنى بەلگىلى بولدى.

19 قاراشادا جۇرگىزىلگەن تەكسەرۋ قورىتىندىسى بويىنشا تسەحتىڭ جۇمىسىنا تىيىم سالىنىپ، قىزمەتكەرلەر ۋاقىتشا جۇمىستان شەتتەتىلدى. كاسىپكەرگە اكىمشىلىك قۇقىق بۇزۋشىلىق تۋرالى كودەكستىڭ 425-بابىنىڭ 1-بولىگى بويىنشا ايىپپۇل سالىندى. سونداي-اق انىقتالعان زاڭبۇزۋشىلىقتاردى جويۋ تۋرالى نۇسقاما بەرىلدى. ايىپپۇل مولشەرى 600 مىڭ تەڭگەدەن اسۋى مۇمكىن.

تسەحتاعى انتيسانيتاريالىق جاعداي تۇسىرىلگەن ۆيدەو كاسىپكەردىڭ ءوزى الەۋمەتتىك جەلىدە جاريالاعاننان كەيىن كەڭىنەن تاراعان. كاسىپكەردىڭ ايتۋىنشا، مۇندا دايىندالعان سامسا كۇن سايىن ەلوردانىڭ شامامەن 300 دۇكەنىنە جەتكىزىلىپ وتىرعان.

وقيعاعا دەيىن «جەتىنشى ارنا» ءتۇسىرىلىم توبى كاسىپورىنعا بارعان كەزدە كاسىپكەر جۋرناليستەرمەن جانجالداسىپ، جۋرناليست قولىنداعى ميكروفونىن تارتىپ الىپ، كامەرانى سىندىرۋعا وقتالعان. كەيىن جانجالعا قاتىسۋشىلار پوليتسيا بولىمىنە جەتكىزىلگەن.

وسى وقيعا بويىنشا كاسىپكەرگە دە 86,5 مىڭ تەڭگەدەن ايىپپۇل سالىنعان.

وسى كولەمدە ميكروفوندى قايتارىپ الۋعا تىرىسقان تەلەوپەراتور دا ايىپپۇل ارقالادى. ولاردىڭ ارەكەتى وزگە ادامنىڭ تىنىشتىعىن بۇزۋ رەتىندە باعالانعان.

پىكىرلەر