شىعىس قازاقستان وبلىسى زايسان اۋدانىنداعى سارىتەرەك اۋىلىندا جاڭعىرتۋدان وتكەن مادەنيەت ءۇيى سالتاناتتى تۇردە اشىلدى. جاڭارعان مادەنيەت وشاعىنىڭ اشىلۋىنا وبلىس اكىمى نۇرىمبەت ساقتاعانوۆ پەن «قازاقستان حالقىنا» قوعامدىق قورىنىڭ باسقارما توراعاسى ءلاززات شىڭعىسباەۆا قاتىستى.
اۋىل ءۇشىن بۇل - جاي عانا عيماراتتىڭ جاڭارۋى ەمەس، مادەني ءومىردىڭ جاڭا كەزەڭىنە باستايتىن ماڭىزدى قادام. ەندى سارىتەرەكتىڭ بالالارى مەن جاستارى ونەرىن شىڭداپ، شىعارماشىلىق قابىلەتىن دامىتىپ، ءتۇرلى باعىتتا ءبىلىمىن جەتىلدىرۋگە مۇمكىندىك الىپ وتىر.
1961 جىلى سالىنعان مادەنيەت ءۇيى ۇزاق جىلدار بويى اۋىل تۇرعىندارىنىڭ باسىن قوسىپ، ءتۇرلى مادەني ءىس-شارالارعا ۇيىتقى بولىپ كەلدى. ۋاقىت تالابىنا ساي جاڭعىرتىلعان نىسان بۇگىندە زاماناۋي جابدىقتارمەن قامتاماسىز ەتىلىپ، 180 ادامعا ارنالعان مادەني-رۋحاني ورتالىققا اينالدى.
2024-2025 جىلدارى وبلىستىق بيۋدجەتتەن مادەنيەت ءۇيىن كۇردەلى جوندەۋگە 345 ملن تەڭگە بولىنگەن. اۋماقتى اباتتاندىرۋ مەن قوسىمشا جوندەۋ جۇمىستارىنا تاعى 11,6 ملن تەڭگە باعىتتالدى.
نىساندى جاڭعىرتۋعا «قازاقستان حالقىنا» قوعامدىق قورى دا قولداۋ كورسەتتى. قوردىڭ كومەگىمەن جۇزەگە اسقان «QH مادەني دامۋ الاڭى» جوباسى اياسىندا مادەنيەت ءۇيى زاماناۋي قۇرال-جابدىقتارمەن قامتىلىپ، وعان ىرگەلەس اۋماق جابدىقتالدى. جوباعا جالپى سوماسى 185,2 ملن تەڭگە باعىتتالىپ، اۋىلدىق كىتاپحانا دا جاڭعىرتىلدى.
سالتاناتتى اشىلۋ راسىمىندە ءسوز سويلەگەن نۇرىمبەت ساقتاعانوۆ اۋىلدارداعى مادەنيەت وشاقتارىن دامىتۋ - ءوڭىردىڭ الەۋمەتتىك ينفراقۇرىلىمىن جاڭعىرتۋدىڭ ماڭىزدى باعىتتارىنىڭ ءبىرى ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ وڭىرلەردى دامىتۋعا، حالىقتىڭ ءومىر ءسۇرۋ ساپاسىن ارتتىرۋعا ەرەكشە ءمان بەرىپ كەلەدى. ءبىزدىڭ باستى ماقساتىمىز - قالا مەن اۋىل تۇرعىندارىنا مادەني يگىلىكتەرگە قول جەتكىزۋدە تەڭ مۇمكىندىك جاساۋ. اۋىل بالاسى دا تۋعان جەرىندە ونەرىن شىڭداپ، قابىلەتىن دامىتا الۋى ءتيىس. وسى ورايدا اۋىل مادەنيەتىن دامىتۋعا قولداۋ كورسەتىپ، جوبانىڭ جۇزەگە اسۋىنا زور ۇلەس قوسقان «قازاقستان حالقىنا» قوعامدىق قورىنا العىسىمدى بىلدىرەمىن»، - دەدى ايماق باسشىسى.
جاڭارتىلعان مادەنيەت ءۇيىنىڭ باستى ەرەكشەلىگى - مۇندا شىعارماشىلىقتىڭ سان ءتۇرلى باعىتىن دامىتۋعا ارنالعان ارنايى ستۋديالار جاساقتالعان. اتاپ ايتقاندا، مەدياستۋديادا فوتو جانە بەينەتۇسىرىلىم جاساۋعا، بەينەمونتاج بەن تسيفرلىق كونتەنت ازىرلەۋگە بولادى. ال دىبىس جازۋ ستۋدياسى ءان جازىپ، مۋزىكالىق شىعارمالاردى كاسىبي دەڭگەيدە وڭدەۋگە مۇمكىندىك بەرەدى.
ۇلتتىق ونەردى ۇلىقتاۋعا دا ەرەكشە كوڭىل بولىنگەن.
فولكلورلىق ستۋديا، دومبىرا، بايان جانە قوبىز ۇيىرمەلەرى جاس ۇرپاقتىڭ ءداستۇرلى ونەرگە دەگەن قىزىعۋشىلىعىن ارتتىرۋعا باعىتتالعان. سونىمەن قاتار تەاتر، ۆوكال جانە كوسپلەي ستۋديالارى جۇمىس ىستەيدى. حورەوگرافيا زالى دا جاس ونەرپازداردىڭ شىعارماشىلىق ىزدەنىسىنە جول اشادى.
كوسپلەي ستۋدياسىنىڭ اشىلۋى جاستار ءۇشىن تىڭ مۇمكىندىك بولماق. مۇندا ولار ءتۇرلى كەيىپكەرلەردىڭ بەينەسىن جاساپ، كوستيۋمدەر ازىرلەۋ ارقىلى قيالى مەن شىعارماشىلىق قابىلەتىن دامىتا الادى.
مادەنيەت ءۇيى تەك ۇيىرمەلەر وتەتىن ورىن عانا ەمەس، اۋىل تۇرعىندارى باس قوساتىن، ونەر مەن ءداستۇر توعىساتىن ورتاعا اينالماق.
