كورمەنىڭ ءبىر بولىگىنە اباي مۇرالارى قويىلماق، دەپ حابارلايدى قازاقپارات ءتىلشىسى.
«قازاقستان پرەزيدەنتى قاسىم-جومارت توقاەۆتىڭ «ابايدىڭ 175 جىلدىعىن مەرەكەلەۋ تۋرالى» جارلىعىن جۇزەگە اسىرۋ اياسىندا وبلىستىق تۇجىرىمداما مەن وڭىرلىك ءىس-شارالار جوسپارى ازىرلەندى. ولاردى ءساتتى وتكىزۋ جونىندە جۇمىس كوميسسياسى قۇرىلدى. كوميسسيا قۇرامىنا ءارتۇرلى قىزمەت سالاسىنىڭ وكىلدەرى – تاريحشىلار مەن ادەبيەتتانۋشىلار، قوعام قايراتكەرلەرى مەن جۋرناليستەر كىردى»، - دەدى شىعىس قازاقستان وبلىسىنىڭ اكىمى دانيال احمەتوۆ.
ونىڭ ايتۋىنا قاراعاندا، جوسپارعا ەنگەن ءىس-شارالار كەشەنىنىڭ نەگىزگى ماقساتى – ابايدىڭ كوپ قىرلى فيلوسوفيالىق جانە شىعارماشىلىق مۇراسىن جان-جاقتى اشۋ ارقىلى دوستىق پەن جاسامپازدىقتى كورسەتۋ بولىپ وتىر.
«اباي جىلى اياسىندا 560 شارا وتكىزەمىز. سونىمەن بىرگە، الداعى جىلدارى كەمبريدج ۋنيۆەرسيتەتىنىڭ «Fitzwilliam» مۇراجايىندا ۇلكەن «ۇلى دالا التىنى» كورمەسىن وتكىزەمىز. ول كورمەنىڭ ءبىر بولىگى – اباي مۇراسى مەن شىعارماسىنا ارنالادى. ول كورمە اتالمىش مۇراجايدا كەلەسى جىلدىڭ ماۋسىم ايىنان تامىزىنا دەيىن ۇيىمداستىرىلادى. وسىلايشا، اعىلشىندار ۇلى دالانىڭ تاريحىمەن تانىسادى»، - دەدى ول.
«ادىرنا» پورتالى
