بۇگىن مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىن تىڭداي وتىرىپ، ەلىمىز ءۇشىن اسا ماڭىزدى جاڭا باعىتتار ايقىندالدى. پرەزيدەنت كوتەرگەن ماسەلەلەردىڭ وزەگى – ادىلەتتى قوعام قۇرۋ، ەكونوميكا مەن ءبىلىمدى جاڭا ساتىعا شىعارۋ، زاماناۋي تەحنولوگيانى باتىل ەنگىزۋ.
جولداۋدا ەرەكشە نازار اۋدارىلعان سالالاردىڭ ءبىرى – ءبىلىم. پرەزيدەنت جاساندى ينتەللەكتىنى مەڭگەرۋ مەكتەپ قابىرعاسىنان باستالۋى قاجەت ەكەنىن ناقتى اتاپ ءوتتى. بۇل — ءبىز ءۇشىن عانا ەمەس، ۇرپاقتىڭ بولاشاعى ءۇشىن دە تاريحي شەشىم. ارنايى وقۋ باعدارلامالارى مەن وقۋ ماتەريالدارىنىڭ ازىرلەنۋى، ۇستازداردىڭ AI داعدىلارىن قالىپتاستىرۋى – ەلىمىزدىڭ ءبىلىم جۇيەسىن تۇبەگەيلى جاڭارتۋعا جاسالعان ناقتى قادام. «Qazaq Digital Mektebi» ۇلگىسىنىڭ قولعا الىنۋى اۋىلداعى وقۋشىلارعا دا ساپالى ءبىلىم الۋعا تەڭ مۇمكىندىك بەرەتىنىن قۋانا قولدايمىن.
Arman-PV باسپاسى بۇل جۇمىستى الدەقاشان باستاپ كەتكەن. ءبىز Ekitap.kz پلاتفورماسى مەن ArmanAI جوباسىن دامىتىپ، جاساندى ينتەللەكتىنى ءبىلىم بەرۋ پروتسەسىنە ناقتى ەنگىزىپ جاتىرمىز. پرەزيدەنتتىڭ بۇگىنگى باستامالارى ءبىزدىڭ وسى ەڭبەگىمىزدى جالعاستىرۋعا جاڭا سەرپىن بەرەدى.
پرەزيدەنت بۇگىن سۋ ماسەلەسىنە دە توقتالدى. سۋ تاپشىلىعى – تەك ەكونوميكالىق ەمەس، بولاشاقتاعى الەۋمەتتىك تۇراقتىلىققا اسەر ەتەتىن ماڭىزدى تاقىرىپ. بۇل ماسەلەنى شەشۋ ءۇشىن قوعامدا جاڭا ەكولوگيالىق مادەنيەت قالىپتاستىرۋ قاجەت.
Arman-PV باسپاسىندا دايىندالعان «جاھاندىق قۇزىرەتتەر» وقۋلىعىندا وسى تاقىرىپ تەرەڭ زەرتتەلىپ، وقۋ باعدارلاماسىنا ەنگىزىلدى. ويتكەنى، سۋدىڭ قۇندىلىعى مەن ونى ۇقىپتى پايدالانۋ قاجەتتىگىن ءاربىر بالا مەكتەپ قابىرعاسىنان باستاپ ءبىلۋى ءتيىس دەپ ەسەپتەيمىن.
جولداۋدا ايتىلعان تاعى ءبىر ماڭىزدى تۇس – ينۆەستيتسيالىق احۋالدى جاقسارتۋ جانە كاسىپكەرلىككە قولداۋ. ينۆەستيتسيالىق شتاب پەن جاڭا تسيفرلىق پلاتفورمالار بيزنەستىڭ دامۋىنا جاڭا ارنا اشادى. اسىرەسە، شاعىن جانە ورتا بيزنەسكە كورسەتىلەتىن قولداۋ – ەلدىڭ ەكونوميكالىق تۇراقتىلىعىنىڭ كەپىلى.
دەگەنمەن، پرەزيدەنت ايتقانداي، رەفورمالاردىڭ باياۋ ءجۇرۋى مەن بيۋروكراتيالىق كەدەرگىلەر ءالى دە شەشىمىن تابۋى ءتيىس. بۇل سىن ورىندى. مەملەكەت تاراپىنان قويىلعان مىندەتتەردىڭ ورىندالۋى ناقتى ناتيجەمەن كورىنۋى – بيزنەس قاۋىمداستىعى ءۇشىن شەشۋشى فاكتور.
جولداۋدا الەۋمەتتىك ادىلەتتىلىك ماسەلەسى دە كەڭىنەن قوزعالدى. ەكونوميكالىق رەفورمالار حالىقتىڭ كۇندەلىكتى ومىرىنە وڭ اسەر ەتۋى ءۇشىن ادىلدىك قاعيداسى باستى ولشەم بولۋى ءتيىس. بۇل قاعيدانى ءاربىر بيزنەس وكىلى، سونىڭ ىشىندە ءبىزدىڭ سالا دا باسشىلىققا الۋى كەرەك.
پرەزيدەنتتىڭ جولداۋى – تەك مەملەكەتتىك جوسپار ەمەس، اربىرىمىزگە باعىت-باعدار بەرەتىن ستراتەگيالىق قۇجات. وندا ءبىلىم سالاسىنا جاساندى ينتەللەكتىنى ەنگىزۋ، سۋ رەسۋرستارىن ۇقىپتى پايدالانۋ مادەنيەتىن قالىپتاستىرۋ، كاسىپكەرلىككە جاڭا مۇمكىندىكتەر اشۋ، الەۋمەتتىك ادىلەتتىلىكتى نىعايتۋ سەكىلدى ۇلكەن مىندەتتەر قويىلدى.
Arman-PV ۇجىمى وسى مىندەتتەردى جۇزەگە اسىرۋ جولىندا ءوز ۇلەسىن قوسا بەرمەك. ءبىزدىڭ باستى ماقساتىمىز – جاڭا ءداۋىردىڭ ءبىلىمدى، ويلى، جاۋاپتى ازاماتىن قالىپتاستىرۋعا اتسالىسۋ.
ديدارا الينا
Arman-PV باسپاسىنىڭ باس ديرەكتورى
