بۇگىن، 17 مامىردا قازاقستان پرەزيدەنتى قاسىم-جومارت توقاەۆتىڭ تۋعان كۇنى. بيىل مەملەكەت باسشىسى 73 جاسقا تولىپ وتىر، دەپ حابارلايدى "ادىرنا".
اقوردانىڭ رەسمي سايتىنىڭ مالىمەتى بويىنشا، قاسىم-جومارت توقاەۆ 1953 جىلى 17 مامىردا الماتى قالاسىندا دۇنيەگە كەلگەن.
اكەسى – كەمەل توقاەۆ (1923-1986) ۇلى وتان سوعىسىنىڭ ارداگەرى، بەلگىلى جازۋشى، قازاق ادەبيەتىنىڭ دەتەكتيۆتى-شىتىرمان وقيعالى جانرىنىڭ نەگىزىن قالاۋشى. شەشەسى – تۇرار شابارباەۆا (1931-2000) الماتى شەت تىلدەرى پەداگوگيكالىق ينستيتۋتىندا قىزمەت ەتكەن.
قاسىم-جومارت كەمەلۇلى توقاەۆ 1975 جىلى ماسكەۋ مەملەكەتتىك حالىقارالىق قاتىناستار ينستيتۋىن بىتىرگەن. كسرو-نىڭ قىتاي حالىق رەسپۋبليكاسىنداعى ەلشىلىگىندە ديپلوم الدىنداعى تاعىلىمدامادان وتكەن. 1983-1984 جىلدار ارالىعىندا بەيجىڭ لينگۆيستيكا ينستيتۋتىندا تاعىلىمدامادان ءوتتى. 1992 جىلى رەسەي فەدەراتسياسى سىرتقى ىستەر مينيسترلىگىنىڭ ديپلوماتيالىق اكادەمياسىن ءتامامدادى.
ەڭبەك جولىن 1975 جىلى كسرو-نىڭ سىرتقى ىستەر مينيسترلىگىندە باستاپ، كەڭەس وداعىنىڭ سينگاپۋر رەسپۋبليكاسىنداعى ەلشىلىگىنە جۇمىسقا جولدانعان. 1979 جىلى كسرو سىرتقى ىستەر مينيسترلىگىنىڭ اپپاراتىنا ورالادى. 1984-1985 جىلدار ارالىعىندا كسرو سىرتقى ىستەر مينيسترلىگىندە قىزمەت اتقارىپ، كەيىننەن كەڭەس وداعىنىڭ قىتاي حالىق رەسپۋبليكاسىنداعى ەلشىلىگىنە جىبەرىلدى. وندا 1991 جىلعا دەيىن ەكىنشى حاتشى، ءبىرىنشى حاتشى جانە كەڭەسشى لاۋازىمدارىندا قىزمەت ىستەيدى.
1992 جىلى قازاقستان سىرتقى ىستەر ءمينيسترىنىڭ ورىنباسارى بولىپ تاعايىندالادى. 1993 جىلى قازاقستان سىرتقى ىستەر ءمينيسترىنىڭ ءبىرىنشى ورىنباسارى بولدى. 1994 جىلى ەلىمىزدىڭ سىرتقى ىستەر ءمينيسترى بولىپ تاعايىندالادى. 1999 جىلعى ناۋرىزدا قازاقستان پرەمەر-ءمينيسترىنىڭ ورىنباسارى بولدى. 1999 جىلعى قازاندا پارلامەنتتىڭ كەلىسىمى بويىنشا قازاقستان پرەزيدەنتىنىڭ جارلىعىمەن پرەمەر-مينيستر بولىپ تاعايىندالدى. 2002 جىلعى قاڭتاردا قازاقستان مەملەكەتتىك حاتشىسى – سىرتقى ىستەر ءمينيسترى بولدى. 2003-2007 جىلدارى – قازاقستان سىرتقى ىستەر ءمينيسترى. بۇل قىزمەتتە جاھاندىق يادرولىق قارۋ-جاراقتى تاراتپاۋ ۇدەرىسىنە بەلسەندى ات سالىستى.
2007 جىلعى قاڭتاردا قازاقستان پارلامەنت سەناتىنىڭ توراعاسى بولىپ سايلاندى. 2008 جىلى قازاقستان پارلامەنتىنىڭ جوعارى پالاتاسىنىڭ سپيكەرى رەتىندە ەقىۇ پارلامەنتتىك اسسامبلەياسىنىڭ ۆيتسە-پرەزيدەنتى بولىپ سايلاندى.
2011 جىلعى ناۋرىزدا بۇۇ باس حاتشىسىنىڭ ورىنباسارى، بۇۇ-نىڭ جەنەۆاداعى بولىمشەسىنىڭ باس ديرەكتورى، سونداي-اق قارۋسىزدانۋ جونىندەگى كونفەرەنتسيادا بۇۇ باس حاتشىسىنىڭ جەكە وكىلى بولىپ تاعايىندالدى. سونىمەن قاتار قارۋسىزدانۋ جونىندەگى كونفەرەنتسيانىڭ باس حاتشىسى لاۋازىمىن اتقاردى. تمد-نىڭ جانە شانحاي ىنتىماقتاستىق ۇيىمىنىڭ سىرتقى ىستەر مينيسترلەرى كەڭەسىنىڭ توراعاسى بولىپ سايلاندى.
2013 جىلعى 16 قازاندا قازاقستان پارلامەنت سەناتىنىڭ توراعاسى بولىپ قايتا سايلاندى.
2019 جىلعى 20 ناۋرىزدا قازاقستان پرەزيدەنتى رەتىندە انت قابىلدادى.
2019 جىلى 9 ماۋسىمدا وتكەن كەزەكتەن تىس پرەزيدەنت سايلاۋىندا 70,96 پايىز داۋىس جيناپ، قازاقستان پرەزيدەنتى بولىپ سايلاندى. 2019 جىلى 12 ماۋسىمدا قر كونستيتۋتسياسىنىڭ 42-بابىنا سايكەس انت بەرىپ، رەسمي تۇردە سايلانعان پرەزيدەنت رەتىندە مەملەكەت باسشىسىنىڭ لاۋازىمىنا كىرىستى.
قاسىم-جومارت توقاەۆ 2022 جىلدىڭ 20 قاراشاسىندا وتكەن كەزەكتەن تىس پرەزيدەنت سايلاۋىندا 81,31% داۋىس جيناپ، جەڭىسكە جەتتى. 2022 جىلى 26 قاراشادا قازاقستان پرەزيدەنتىن سالتاناتتى ۇلىقتاۋ ءراسىمى ءوتتى.
2021 جىلى ءساۋىر ايىنان باستاپ قازاقستان حالقى اسسامبلەياسىنىڭ توراعاسى. 2022 جىلى قاڭتار ايىنان باستاپ قازاقستان قاۋىپسىزدىك كەڭەسىنىڭ توراعاسى. توتەنشە جانە وكىلەتتى ەلشى. ساياسي عىلىمدارىنىڭ دوكتورى. دۇنيەجۇزىلىك گۋمانيتارلىق جانە جاراتىلىستانۋ عىلىمدارى اكادەمياسىنىڭ تولىق مۇشەسى. قاۋىپسىزدىك جونىندەگى ميۋنحەن كونفەرەنتسياسى "عۇلامالار كەڭەسىنىڭ" مۇشەسى. شەنچجەن ۋنيۆەرسيتەتىنىڭ (قحر) جانە رەسەي فەدەراتسياسىنىڭ سىرتقى ىستەر مينيسترلىگى ديپلوماتيالىق اكادەمياسىنىڭ قۇرمەتتى پروفەسسورى. قازاقستاننىڭ حالىقارالىق قاتىناستار جونىندەگى كەڭەسىنىڭ قۇرمەتتى پرەزيدەنتى. جەنەۆا ديپلوماتيا جانە حالىقارالىق قاتىناستار مەكتەبىنىڭ قۇرمەتتى دەكانى. رەسەي بيوگرافيالىق قوعامىنىڭ تۇجىرىمى بويىنشا 2018 جىلدىڭ "جىل ادامى" لاۋرەاتتارىنىڭ تىزىمىنە ەنگەن. 13 جىل بويى قازاقستاننىڭ ۇستەل تەننيسى فەدەراتسياسىن باسقاردى.
سونداي-اق، ول حالىقارالىق قاتىناستار ماسەلەلەرىنە ارنالعان 10 كىتاپتىڭ اۆتورى.
