Maŋǧystau oblysynda Memleket basşysynyŋ «Jaŋa tarihi kezeŋdegı Qazaqstannyŋ özektı mındetterı» atty Qazaqstan halqyna Joldauyn tüsındıru maqsatynda qūrylǧan jūmys toptary öŋır tūrǧyndary jäne eŋbek ūjymdarymen bırqatar kezdesu ötkızdı.
Jaŋaözen qalasynda Qūryltai deputaty Abbat Örısbaev qalalyq köpsalaly auruhananyŋ medisina qyzmetkerlerımen kezdestı. Jiynǧa qala äkımı Symbat Töretaev, QR Densaulyq saqtau ministrlıgı Medisinalyq baqylau komitetınıŋ töraiymy Laura Ahmetniiaz jäne «Ädılet» partiiasy oblystyq filialynyŋ töraǧasy İmammahmūt Şaǧyrbaev qatysty.
Kezdesu barysynda Abbat Örısbaev Memleket basşysynyŋ Joldauynda belgılengen mındetterdıŋ eldıŋ saiasi jäne äleumettık-ekonomikalyq damuy üşın maŋyzyna toqtaldy. Onyŋ aituynşa, biylǧy Joldau elımızdıŋ 35 jyldyq Täuelsızdıgı qarsaŋyndaǧy auqymdy saiasi reformalardyŋ jalǧasy bolyp sanalady. Atap aitqanda, jaŋa Konstitusiianyŋ qabyldanuy, bırpalataly Parlamenttıŋ sailanuy, Halyq keŋesınıŋ jūmysyn bastauy jäne Vise-prezident institutynyŋ qūryluy el basqaru jüiesındegı maŋyzdy özgerısterdıŋ bırı.
Sonymen qatar deputat öŋırde «Halyqtyq qūrylys» jobasy aiasynda jüzege asyrylatyn medisinalyq infraqūrylymdy damytu bastamalaryna nazar audardy. Joldauda halyqtyŋ ömır sapasyn jaqsartu, medisinalyq qyzmettıŋ qoljetımdılıgın arttyru jäne äleumettık nysandardy jaŋǧyrtu mäselelerı basym baǧyttardyŋ bırı retınde aiqyndalǧanyn jetkızdı.
Al QR Densaulyq saqtau ministrlıgı Medisinalyq baqylau komitetınıŋ töraiymy Laura Ahmetniiaz sala boiynşa aldaǧy uaqytta atqarylatyn auqymdy jobalarǧa toqtaldy. Ol medisinalyq infraqūrylymdy jaŋǧyrtu, ana men bala densaulyǧyn qorǧau jäne densaulyq saqtau salasyna ozyq tehnologiialardy engızu baǧytyndaǧy jūmystardy atap öttı.
Būdan keiın jūmys toby Maŋǧystau atom energetikalyq kombinatynyŋ (MAEK) qyzmetkerlerımen kezdestı. Jiynǧa Qazaqstan Halyq keŋesınıŋ müşesı, Maŋǧystau oblysy qoǧamdyq keŋesınıŋ töraǧasy Bekmūrat Jüsıpov, oblystyq aqsaqaldar keŋesınıŋ töraǧasy Oŋaibek Äbdılov, Qazaqstan Halyq keŋesınıŋ müşesı, ekolog Kirill Osin jäne «Ädılet» partiiasy oblystyq filialy töraǧasynyŋ orynbasary Anar Şamşadinova qatysty.
Kezdesude eldıŋ ekonomikalyq damuy, energetikalyq qauıpsızdık, kölık-logistika äleuetı, äleumettık infraqūrylymdy jetıldıru jäne qoǧamdyq kelısımdı nyǧaitu mäselelerı talqylandy. Sondai-aq Qazaqstannyŋ tranzittık mümkındıkterın arttyru, AES salu, Kendırlı äuejaiyn ıske qosu jäne öŋırdıŋ turistık äleuetın damytu baǧyttaryna nazar audaryldy.
Qazaqstan Halyq keŋesınıŋ müşesı Bekmūrat Jüsıpov öŋırdegı äleumettık infraqūrylymdy damytu mäselesıne toqtaldy. Onyŋ aituynşa, Maŋǧystauda bala tuu körsetkışınıŋ joǧary boluyna bailanysty ana men bala densaulyǧyn qorǧau baǧytyndaǧy nysandardyŋ maŋyzy zor. Osy rette Aqtau qalasynda 350 oryndyq köpbeiındı balalar auruhanasyn salu josparlanyp otyrǧanyn jetkızdı.
Būdan bölek, jūmys toby «QazAzot» aksionerlık qoǧamynyŋ eŋbek ūjymymen de kezdestı. Jiynda «Ädılet» partiiasy oblystyq filialy töraǧasynyŋ orynbasary Anar Şamşadinova Joldaudaǧy halyqtyŋ äl-auqatyn arttyruǧa baǧyttalǧan bastamalardy tüsındırdı. Atap aitqanda, «Halyqtyq qūrylys» bastamasy aiasynda densaulyq saqtau salasynda 70-ten astam, bılım beru jäne mädeniet baǧytynda 50-den astam nysan salu josparlanǧanyn aitty. Sondai-aq energetikalyq qauıpsızdık, infraqūrylym jäne şaǧyn jäne orta biznestı qoldau mäselelerı söz boldy.
Sonymen qatar Aqtau qalasynda bılım beru salasy men etnomädeni bırlestıkter ökılderınıŋ qatysuymen kezdesu ūiymdastyryldy. Oǧan QR Ūlttyq ekonomika ministrlıgı Tabiǧi monopoliialardy retteu komitetınıŋ töraǧasy Timur Qosymbaev, Qazaqstan Halyq keŋesınıŋ müşesı Rauşan Aimurzaeva, oblystyq aqparat jäne qoǧamdyq damu basqarmasynyŋ basşysy Gülmira Balǧojaeva, «Ädılet» partiiasy oblystyq filialy töraǧasynyŋ orynbasary Nūrbek Qarasaev jäne «Bereket-F» kompaniiasynyŋ bas direktory Zareta Fatalieva qatysty.
Jiynda bılım beru infraqūrylymyn damytu, äleumettık nysandardyŋ qoljetımdılıgın arttyru, etnosaralyq kelısım men qoǧamdyq tūraqtylyqty saqtau mäselelerı qozǧaldy.
«Ädılet» partiiasy oblystyq filialy töraǧasynyŋ orynbasary Nūrbek Qarasaevtyŋ aituynşa, Memleket basşysynyŋ Joldauynda elımızdıŋ aldaǧy damu kezeŋıne arnalǧan maŋyzdy mındetter aiqyndalǧan. Sondyqtan ondaǧy bastamalardyŋ mazmūnyn är sala ökılderıne tüsındırıp, olardy ıske asyru joldaryn talqylau maŋyzdy. Onyŋ sözınşe, mūndai kezdesuler halyq pen memlekettık organdar arasyndaǧy özara bailanysty nyǧaityp, öŋırdegı özektı mäselelerdı ortaǧa saluǧa mümkındık beredı.
Öz kezegınde QR Ūlttyq ekonomika ministrlıgı Tabiǧi monopoliialardy retteu komitetınıŋ töraǧasy Timur Qosymbaev bılım beru nysandaryn salu jäne kürdelı jöndeuden ötkızu tärtıbın tüsındırıp, jergılıktı deŋgeide jobalardy sapaly äzırlep, qajettı qūjattardy uaqytyly ūsynudyŋ maŋyzyn atap öttı. Sondai-aq ministrlık komitetı öz qūzyretı şeŋberınde öŋırdegı äleumettık nysandardy damytuǧa baǧyttalǧan bastamalardy qoldauǧa jäne tiıstı deŋgeide köteruge daiyn ekenın jetkızdı.
Kezdesuler barysynda qatysuşylar özderın tolǧandyrǧan sūraqtaryn qoiyp, ūsynys-pıkırlerın ortaǧa saldy. Jūmys toptarynyŋ ökılderı Joldauda belgılengen mındetterdı jüzege asyru tetıkterı boiynşa tüsınıkteme berdı.
