پرەزيدەنت كونستيتۋتسياعا تۇزەتۋلەر جوباسى بويىنشا رەسپۋبليكالىق رەفەرەندۋم وتكىزۋ تۋرالى جارلىققا قول قويدى

2807
Adyrna.kz Telegram

بۇگىن پرەزيدەنت ەل كونستيتۋتسياسىنا تۇزەتۋلەر جوباسى بويىنشا رەسپۋبليكالىق رەفەرەندۋم وتكىزۋ تۋرالى جارلىققا قول قويدى. بۇل تۋرالى مەملەكەت حاتشىسى ەرلان قارين Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.

بۇل مەملەكەت باسشىسى قابىلداعان ساياسي ءمانى ەرەكشە ماڭىزدى شەشىم. كونستيتۋتسيالىق رەفورما جونىندەگى رەفەرەندۋم – پرەزيدەنتتىڭ ساياسي رەفورمالار باعدارلاماسىن ىسكە اسىرۋدىڭ كەزەكتى بولىگى. باعدارلاما جۇيەلى تۇردە ىسكە اسادى جانە ول سۋپەرپرەزيدەنتتىك مودەلدەن پرەزيدەنتتىك رەسپۋبليكاعا تۇپكىلىكتى كوشۋدى، بىرقاتار بيلىك وكىلەتتىكتەرىن قايتا ءبولۋدى، پارلامەنتتىڭ ءرولى مەن مارتەبەسىن كۇشەيتۋدى، حالىقتىڭ مەملەكەتتى باسقارۋ ىسىنە ارالاسۋىن ارتتىرۋدى، ازاماتتاردىڭ قۇقىقتارىن قورعاۋدىڭ كونستيتۋتسيالىق تەتىكتەرىن كۇشەيتۋدى كوزدەيدى”،- دەلىنگەن جازبادا.

مەملەكەت حاتشىسىنىڭ ايتۋىنشا، رەفورمالارعا قوعام مەن ساراپشىلاردىڭ سۇرانىستارى مەن ۇسىنىستارى نەگىز بولعاندىقتان، پرەزيدەنتتىڭ ونى رەفەرەندۋم ارقىلى جۇزەگە اسىرۋ تۋرالى باستاما كوتەرۋى قيسىندى.

“ەلىمىزدەگى بۇل رەفەرەندۋمنىڭ ەرەكشەلىگى، پرەزيدەنت ءوز وكىلەتتىلىگىن كەڭەيتەتىن ەمەس، قايتا ونىڭ ءبىر بولىگىن باسقا بيلىك ينستيتۋتتارىنا ءبولىپ بەرەتىن كونستيتۋتسيالىق رەفورماعا باستاماشى بولىپ وتىر. وسىلايشا، الداعى كونستيتۋتسيالىق رەفورما جونىندەگى رەفەرەندۋم مەملەكەت پەن قوعام اراسىنداعى ءوزارا قارىم-قاتىناستاردىڭ جاڭا، نەعۇرلىم ءتيىمدى جانە وڭتايلى مودەلىنە قۇرىلعان ەكىنشى رەسپۋبليكانىڭ قۇقىقتىق نەگىزىن قالايدى”،- دەدى ەرلان قارين.

”ادىرنا” ۇلتتىق پورتالى

پىكىرلەر