سەمەيدە لەنيننىڭ 15 مەترلىك قولا ەسكەرتكىشىن ورنىنان الۋ جۇمىستارى باستالدى، دەپ حابارلايدى «ادىرنا» ءتىلشىسى كتك-عا سىلتەمە جاساپ.
جاماقاەۆ كوشەسىندە ورنالاسقان الاڭدا كەڭەستىك كوسەمدەردىڭ وزگە دە مۇسىندەرى مەن بيۋستتەرى بولعان. الايدا ولاردىڭ بارلىعى الدەقاشان الىنىپ، اۋماق قايتا جاڭارتىلعان. تەك لەنيننىڭ ەسكەرتكىشى عانا قالعان ەدى. ەندى ونى دا بۇزۋ تۋرالى شەشىم قابىلدانعان.
بۇل مونۋمەنت ۆلاديمير لەنينگە ارنالعان قازاقستانداعى عانا ەمەس، تمد ەلدەرىندەگى ەڭ ءىرى ەسكەرتكىشتەردىڭ ءبىرى سانالادى.
ەسكەرتكىش 50 جىلدان استام ۋاقىت بۇرىن ورناتىلعان. سوڭعى ۋاقىتتا وعان كورشىلەس ۇيلەردىڭ تۇرعىندارى شاعىمدانا باستاعان. ولاردىڭ ايتۋىنشا، مونۋمەنتتىڭ سىرتقى كەلبەتى ناشارلاعان ءارى قۇلاپ كەتۋ قاۋپى بار. ارنايى كوميسسيا دا ەسكەرتكىشتىڭ جاعدايىنا الاڭداۋشىلىق بىلدىرگەن. ساراپشىلار جۇمساق توپىراقتىڭ سالدارىنان ءمۇسىننىڭ قيسايعانىن انىقتاعان.
«تەكسەرۋ بارىسىندا انىقتالعان اقاۋلار، ونىڭ ىشىندە تىرەك توراپتارى مەن تىرەك تاقتاسىنىڭ زاقىمدانۋى، مەتالل كونسترۋكتسيالاردىڭ قاتتى كورروزياعا ۇشىراۋى، سونداي-اق وتپەلى جارىقتار مەن ساڭىلاۋلاردىڭ بولۋى قۇرىلىمنىڭ كوتەرگىش قابىلەتىنىڭ كۇرت تومەندەگەنىن كورسەتەدى. بۇل ءمۇسىن بولىكتەرىنىڭ قۇلاۋىنا تىكەلەي قاۋىپ توندىرەدى»، – دەپ مالىمدەدى سەمەي قالاسىنىڭ اكىمدىگى.
قالا بيلىگى ەسكەرتكىشتىڭ بۇدان كەيىنگى تاعدىرى ازىرگە بەلگىسىز ەكەنىن جەتكىزگەن.
ەسكە سالايىق، قىركۇيەكتە الماتىنىڭ تۇركسىب اۋدانىندا ۆلاديمير لەنيننىڭ ەسكەرتكىشى الىنىپ تاستالعان ەدى.
