فوتو: Reuters
بولگاريانىڭ وڭتۇستىك-شىعىسىنداعى «فراكيا» اۆتوماگيسترالىندە ەكى ءىرى جول-كولىك وقيعاسى بولىپ، كەمىندە 12 ادام كوز جۇمدى، دەپ حابارلايدى "ادىرنا" ۇلتتىق پورتالى.
تاعى 48 ادام جاراقات الدى. قويۋ تۇمان سالدارىنان ونداعان جەڭىل جانە جۇك كولىگى سوقتىعىسقان.
جول اپاتى يامبول وبلىسىنداعى زيمنيتسا اۋىلىنىڭ ماڭىندا بولعان. ءوڭىر گۋبەرناتورى گەورگي چالاكوۆتىڭ مالىمەتىنشە، العاشقى حابارلاما جەرگىلىكتى ۋاقىت بويىنشا ساعات 07:10-دا تۇسكەن.
كورشىلەس سليۆەن وبلىسىنىڭ گۋبەرناتورى ميحايل كاشەروۆتىڭ ايتۋىنشا، 70-تەن استام كولىك جول اپاتىنا ۇشىراعان.
بولگاريا ۇكىمەتىنىڭ سوڭعى مالىمەتى بويىنشا، وقيعا سالدارىنان 12 ادام قازا تاۋىپ، 48 ادام جاراقات العان. زارداپ شەككەندەر يامبول، سليۆەن جانە بۋرگاس وبلىستارىنداعى اۋرۋحانالارعا جەتكىزىلدى.
قۇتقارۋشىلار زارداپ شەككەندەرگە جەتۋ ءۇشىن جول قورشاۋلارىنىڭ ءبىر بولىگىن الىپ تاستاۋعا ءماجبۇر بولعان. ال قويۋ تۇمانعا بايلانىستى ادامداردى ەۆاكۋاتسيالاۋ ءۇشىن تىكۇشاقتاردى پايدالانۋ مۇمكىن بولماعان.
بيلىك وكىلدەرىنىڭ مالىمەتىنشە، العاشقى اپاتقا شىعىس باعىتتاعى جولدا كورىنۋدىڭ ناشارلاۋى سەبەپ بولعان. ەكىنشى جول اپاتى سوفيا قالاسىنا قاراي باعىتتالعان قارسى جولاقتا تىركەلگەن. بولگاريانىڭ BTA اگەنتتىگى حابارلاعانداي، وعان العاشقى اپاتقا نازار اۋدارعان جۇرگىزۋشىلەردىڭ جولدان الاڭداۋى دا اسەر ەتكەن.
