تانىمال قازاقستاندىق رەجيسسەر ءارى اكتەر نۇرتاس ادامبايدىڭ جۇبايى عاليا ادامباي الەۋمەتتىك جەلىدە وتباسىنداعى كەلىسپەۋشىلىكتەر تۋرالى جازدى. ونىڭ ايتۋىنشا، كۇيەۋى بەلگىلى ءبىر توپتىڭ ىقپالىنا ءتۇسىپ، بۇل جاعداي وتباسى مۇشەلەرىنە، سونىڭ ىشىندە بالالارىنا دا كەرى اسەرىن تيگىزىپ وتىر، دەپ حابارلايدى “ادىرنا”.
عاليا ادامباي Instagram پاراقشاسىندا بىرنەشە جازبا جاريالاپ، پسيحولوگ تورەبەك بەكباەۆتىڭ ۇستانىمدارىن سىنعا العان. ول نۇرتاس ادامباي ءالى كۇنگە دەيىن ءوزى «تورەبەكشىلدىك» دەپ اتايتىن كوزقاراستىڭ ىقپالىندا ەكەنىن مالىمدەدى. ايەلدىڭ سوزىنشە، بۇل جاعداي وتباسىنداعى قارىم-قاتىناسقا جانە بالالاردىڭ تاربيەسىنە بايلانىستى ماسەلەلەر تۋىنداتقان.
«سەكتا وسىلاي جۇمىس ىستەيدى. بالالار مەن ايەلدەر زارداپ شەگەدى. بارلىق قۇجاتتار مەن مامانداردىڭ قورىتىندىلارىن ۇسىنامىن. ونىڭ دا ۋاقىتى كەلەدى. ازىرگە مەن ءۇشىن بالالارىم ءبىرىنشى ورىندا»، – دەپ جازدى ول.
عاليا ادامباي وتباسىنداعى كەلىسپەۋشىلىكتەردىڭ باسىم بولىگى بالالاردىڭ تاربيەسى مەن دەنساۋلىعىنا قاتىستى بولعانىن ايتادى. اتاپ ايتقاندا، ءۇش جاسار قىزىنىڭ ءتىسىن تازالاتۋ، بالالاردىڭ دۇرىس تاماقتانۋى جانە قاجەت بولعان جاعدايدا دارىگەرگە قارالۋى ماسەلەسىندە قيىندىقتار تۋىنداعانىن جەتكىزدى.
ء«ۇش جاسار بالاڭنىڭ ءتىسىن تازالاتۋ ءۇشىن كۇن سايىن كۇرەسۋگە تۋرا كەلەتىن ۇيدە ءومىر ءسۇرۋ – ازاپ. ويتكەنى اكەسى قىزىنىڭ ءوز ەركىنەن تىس بىردەڭە ىستەۋىنە قارسى. بالالارعا دۇرىس، قۇنارلى تاماق بەرۋ دە ماسەلەگە اينالدى. بالا اۋىرىپ قالسا دا، دارىگەرگە اپارماي، وزدىگىنەن جازىلعانىن كۇتۋ كەرەك دەيدى. قۇداي كومەكتەسەدى دەيدى. دارىگەر جازىپ بەرگەن دارىلەردى ىشكىزۋگە دە قارسى. بالا ءوزى قالاماسا، ونى ەمدەۋگە بولمايدى دەپ ەسەپتەيدى. بۇل – نۇرتاس تورەبەكتىڭ سەكتاسىنان ۇيگە الىپ كەلگەن ساندىراقتىڭ، تاس داۋىرىنەن قالعان تۇسىنىكتەردىڭ جۇزدەن ءبىر بولىگى عانا»، – دەدى عاليا.
عاليا بۇل جاعدايدىڭ بىرنەشە جىلدان بەرى جالعاسىپ كەلە جاتقانىن اتاپ ءوتتى. سونداي-اق كۇيەۋىنىڭ ءوز دەنساۋلىعىنا مۇقيات قاراپ، دۇرىس تاماقتانىپ، قاجەتتى دارىلەرىن قابىلدايتىنىن ايتىپ، بالالارعا قاتىستى كوزقاراسىن تۇسىنبەيتىنىن ءبىلدىردى.
عاليا باستاپقىدا تەك تورەبەك بەكباەۆتىڭ «سەكتاسى» تۋرالى ايتىپ، ءوز وتباسىنداعى جاعدايدى كوپشىلىككە جاريا ەتكىسى كەلمەگەن. الايدا، ونىڭ ايتۋىنشا، كۇيەۋى قوقان-لوققى كورسەتىپ، ءتۇرلى ارەكەتتەرىمەن مازاسىن العاندىقتان، سوڭعى بەس جىلدا وتباسىندا نە بولعانىن اشىق ايتۋعا ءماجبۇر بولعان.
«بۇل تۋرالى ەندى ايتپايمىن دەپ شەشكەن ەدىم. بىراق كۇيەۋىم قورقىتىپ، ءجونسىز ارەكەتتەرىمەن مەنى قايتا سويلەۋگە ماجبۇرلەپ وتىر. ماسەلەنى بەيبىت جولمەن شەشۋ مۇمكىن بولماي تۇر. سوندىقتان سوڭعى بەس جىلدا كورگەن-بىلگەنىمدى ايتۋدى جالعاستىرامىن»، – دەپ جازدى ول.
ايەل الداعى ۋاقىتتا ءوز سوزدەرىن راستايتىن قۇجاتتار مەن مامانداردىڭ قورىتىندىلارىن جاريالاۋعا دايىن ەكەنىن مالىمدەدى. سونىمەن قاتار نۇرتاس ادامبايدىڭ ايتقاندارى مەن ارەكەتتەرىنە جاۋاپ بەرمەيتىنىن جەتكىزدى.
ايتا كەتەيىك، نۇرتاس ادامباي مەن تورەبەك بەكباەۆ بۇعان دەيىن ءدىن جانە رۋحاني ماسەلەلەردى تالقىلايتىن Nuradam اتتى ءدىني-اعارتۋشىلىق جوباعا بىرگە قاتىسقان.
